Owayengumabhalane wakuqala onsundu wekhansili yakoBulawayo uDokotela Michael Nkanyiso Ndubiwa ubekwe namuhla emathuneni eLady Stanley Cemetery kulelelodolobho ngemva kwenkonzo yokumvalelisa, eqhutshelwe e Amphitheatre Centenery Park ekuseni.
Abakade besemngcwabeni ka Dokotela Ndubiwa bamncome besithi ubeyindoda emadodeni, njalo uliqhawe elingadingwayo ngomsebenzi awenzela ilizwe.
Bonke abaphiwe ithuba lokethula amazwi enduduzo lokumvalelisa bathe ubesebenza gadalala njalo elobuqotho.
Umphathintambo wedolobho lakoBulawayo uNkosikazi Judith Ncube uchaze umuyi njengomuntu owasungula inhlelo ezinengi zentuthuko ezilokhe zisebenza njalo eziyizo ezipha lelidolobho isithunzi.
Umkhokheli webandla leZAPU, uMnu. Isaac Mabuka uthe idolobho lilahlekelwe.
Ukhomishina Japhet Ndabeni Ncube, owaye ngumayor wedolobho lakoBulawayo uthe ilizwe lilahlekelwe yindoda eyayisazi abantu lomsebenzi.
Omunye njalo owayengumayor walelidolobho uMnu. Patrick Thaba Moyo uthe balusizi ngokulahlekelwa yindoda eyayisebenzela uBulawayo ngothando.
UMnu. Moffat Ndlovu owayengumabhalane wekhansili yakoBulawayo uthe kakho ongenelisa ukufeza okwenziwe ngumuyi.
Indodana kamuyi uHorace Ndubiwa uchaze ukuba uyise ubeqotho ekuphileni kwakhe lemuli njalo balahlekelwe. Uthe ubephethwe ngumkhuhlane wezinso oyiwo omthetheyo esesibhedlela seMater Dei Hospital ngoLwesibili.
Umuyi, ozelwe ngo 1934 eCezwane, wayengonsundu wakuqala ukuba ngumabhalane jikelele kuzwekazi leAfrica.
Utshiye ikhosikazi lakhe uLydia, abantwana abane, abazukulu abayisificaminwe mibili lezizukulwane eziyisithupha.
Your browser doesn’t support HTML5
UAnnahstacia Ndlovu Uyalandisa