Amacele womabili eMDC athi asekela uhlelo lokuthi izabelo zinikezwe amandla okuzibusa, i Devolution of Power.
Phansi kohlelo lolu, isabelo sinye ngasinye siyabe silelungelo lokuqhuba inhlelo zaso singaphanjaniswa nguhulumende welizwe. Izabelo zeMandebeleni zihlezi zikhankasela loluhlelo.
Ekhuluma emhlanganweni awenzele edolobheni lakoKulawayo ngeSonto, inhloko kahulumende uMnu Morgan Tsvangirai uthe uzulu weZimbabwe kumele afake loluhlelo ekulotshweni kwesisekelo sombuso esitsha.
Umsekeli wenhloko kahulumende uMnu Arthur Mutambara laye uthi uyakusekela ukuzibusa kwezabelo, esithi le yinto enhle ezakwenza izabelo zonke zelizwe zizithuthukise, hatshi ukutshiywa muva kunhlelo zentuthuko nguhulumende welizwe.
Kodwa isikhulumeli seZanu PF uMnu Rugare Gumbo uthe ibandla lakhe alifuni lakuzwa nge devolution. Amazwe asebenzisa loluhlelo agoqela iSouth Africa leMelika.
Ingcwethi ecubungula ezombusazwe uMnu George Mkhwanazi utshayele uTsvangirai loMutambara ihlombe ngokusekela uhlelo lolu, kungxoxo ayenze loNtungamili Nkomo weStudio 7.