Ukuqhubeka kokonakala komnotho welizwe sekubangele ukuthi izisebenzi zithembise ukuthi zingangena ezitaladeni zitshengisela zisola indlela uhulumende abusa ngayo.
Lokhu kwenzakala lanxa ngesikhathi esedluleyo ukutshengisela akuzake kwamukelwe ngabanengi okwenza kungaphathisi.
Ukuhlaziya loludaba sixoxe lengcwethi kwezomnotho, uMnu. Sam Ncube owake waba yisiphathamandla senhlanganiso elwela ukuthuthukisa abensundu, iAAG.
UNcube uthi: "Silohlupho olumangalisayo njengelizwe le Southern Africa eselilobuyanga obumangalisayo.Ubuyanga obukhona elizweni buyabonakala ngoba abantu abangasasebenziyo bayafika 85 percent."
UNcube uthi kwamanye amazwe angomakhelwane eSouthern Africa anjengabo Malawi, Zambia, South Africa, Mozambique le Namibia akobo 20 percent abantu abangasebenziyo. Kodwa uthi i85 percent eye Zimbabwe itshengisa ubuyanga.
"Olunye uhlupho olubekhona obuzadala udubo olumangalisayo akunanga izulu. UDecember uyaphela kuyonale iviki izulu kalikani akukalinywa. Inotho yamazwe asathuthukayo afana lelethu aphakanyiswa yikulima," kutsho uNcube.
Ingcwethi zomkhathi zithi lonyaka kuzakuba leyezi lendlela elithiwa El Nino elizahlasela isigaba somhlaba jikelele okugoqela isigaba se Southern Africa.
UNcube uthi: "Okunye okubangela lona lolu udubo ukuthi izinto ziye phansi yibugebenga, ubusela ukuthatha imali ebantwini abanengi isiya kwabalutshwana."
UNcube uthi okungaphathisa isizwe ukuthi sithuthuke yikumanyana lokukhulumisana kudonselwe ndawonye.
Wengezelele esithi abantu kabakaze babale umthetho owokuthuthukisa umnotho wabensundu owe Indigenization othi isabelo senkampani esedlula ingxenye kumele siye kwabensundu ngoba lumthetho usebenza kumankampani awokwemba kuphela hatshi amabhimusi wonke.
Your browser doesn’t support HTML5
Ingxoxo loMnu. Sam Ncube