UMongameli Robert Mugabe sesole ibutho lamazwe angentshonalanga, eleNorth Atlantic Treaty Organisation (NATO) ngokuncedisa abahlamuki baseLibya ukugenqula uMoummar Ghadaffi embusweni.
Ekhuluma emhlanganweni weUnited Nations General Assembly eNew York kweleMelika ngoLwesine uMongameli Mugabe uthe amazwe angentshonalanga ahlasele uGhadaffi ngoba efuna ukutshaphaza inotho yeLibya ikakhulu amafutha ezimota.
Usole njalo amazwe la ngokumethesa izijeziso zenotho ndawonye leziphathamandla zebandla lakhe leZanu PF.
UMugabe uphinde wachothoza amazwe athuthukileyo esithi eyisa umanyano wamazwe abensundu oweAfrican Union ngokungafuni ukulalela izixwayiso zawo ngodaba lweLibya.
Usole njalo umthethwandaba weInternational Criminal Court esithi ukhanya wabunjelwa ukuhlukuluza inkokheli yeAfrica leyamazwe asathuthukayo.