UMongameli Mugabe ukhethe abasekeli bakhe ababili kubandla leZanu PF abazakuba njalo ngabasekeli bakhe kuhulumende, uMnu Emmerson Mnangagwa loMnu Phelekezela Mphoko ngoLwesithathu.
UMphoko wayelilunga leZapu njalo uMnangagwa wayengowe Zanu.
UMugabe wethule njalo amalunga edale leZanu PF Politburo agoqela uMnu Obert Mpofu, ophiwe isikhundla sokuba ngumabhalane wezemali, uMnu Savior Kasukuwere osenguCommisar webandla loMnu Kembo Mohadi ongumabhalane obona ngezomvikela.
Obengumgcinisihlalo webandla njalo obekhangelelwe ukuthi laye engaba ngomunye wabasekeli bakamugabe uMnu Simon Khaya Moyo uphiwe isikhundla sokuba yisikhulumeli sebandla.
UMugabe wesule isikhundla sikamgcinisihlalo webandla njalo uthi umsebenzi lo uzaqhutshwa ngabasekeli bakhe bobabili bentshintshana.
UMnu Jonathan Moyo usengumabhalane obona ngeze Science kuthi uNkosikazi Oppah Muchinguri uphiwe isikhundla sikamabhalane obona ngezemigwaqo.
UMnu Cain Mathema ngumabhalane wokwabiwa komhlabathi kuthi uNKosikazi Thokozile Mathuthu ukwezokulinganiswa kwamathuba phakathi kwabesilisa labesifazana.
UMnu Joshua Malinga ungumabhalane olobona ngezabantu abagogeileyo.
UMugabe uthe uzafungisa abasekeli bakhe labaphathintambo bakhe kusasa kumbe ngoLwesihlanu ukuthatha izikhundla zabo kuhulumende.
Ukuhlaziya loludaba sixhume ingxwethi kwezombusazwe uMnu Nkululeko Sibanda.