UMongameli Robert Mugabe uthi uzasusa umsekeli wakhe, uMnu. Emmerson Mnangagwa, esikhundleni nxa engaqhubekela phambili esenza kubelokuxokozela kubandla leZanu PF.
Zanu PF Presidential Youth Interface Rally
UMugabe wethule lokhu ngoMgqibelo enkundleni yeWhite City Stadium lapho obekulomkhosi webandla leli owe Presidential Youth Interface Rally owokukhankasela ukhetho oluzakwenziwa ngomnyaka ozayo.
Ubezonde egan’unwabu esethule lokhu kulandela ukukhonona okumngceke emkhosini lo okwenziwa ngamanye amalunga ebandla leli uNkosikazi Grace Mugabe ekhuluma enkundleni le.
A lot of people attended the rally
“Silapha koBulawayo lapho esidinga khona usekelo lwabantu abalakho ukusivotela kukhetho oluzayo. Idolobho lakoBulawayo yilo phela elilandele eleHarare ngobukhulu ngakho-ke akusoze kulunge nxa singanqotshwa lapha. Okumangalisayo yikuthi kulabantu ababuye lapha bejonge ukwenzela phansi ikhosikazi lami. Besengikuzwile phambilini lokhu. Ulelungelo lokukhuluma intando yakhe.
“Siyakwazi ukuthi kulabantu beMasvingo leNkabazwe abathi indawo lezi kazisizo zami ngezika Mnangagwa. Sengizwile ukuthi konke lokhu kwenziwa nguMnangagwa. Ngaphambanisa naukuthi ngimkhethe ukuba abengumsekeli wami na?
UMugabe uqhubekele phambili esethula amagama aqathat ngoMnangagwa esithi nxa efuna kumele abumbe ibandla lakhe hatshi ukwenza kube lokuxokozela kubandla leZanu PF, lapho acatshangelwa ukuba ulecele elifuna athathe isikhundla sikamongameli elizibiza ngokuthi yi-Team Lacoste. Elinye elithiwa yi-Generation 40 licatshangelwa ukuba likhokhelwa nguNkosikazi Grace Mugabe.
Abatsha abasemkhosini wePresidential Youth Interface Rally eWhite City koBulawayo.
Ubesidla amahabula uMugabe ngathi kwenziwa ngumsekeli wakhe. “…Ngaphambanisa na ukuthi ngimnike isikhundla lesi? Nxa ngaphambanisa kumele ngimsuse esikhundleni lesi kungakatshoni ilanga kusasa. Nxa efuna labasekeli bakhe kababumbe elabo ibandla. Singeke saphila ngokuthukwa langokuxokozela kubandla lethu. Kuyayangisa ukuthi ngesikhathi sesigqiba umkhosi wethu lo kubesokusiba lamanyala la. Angikufuni lokhu.”
Umkakhe ubeyitshukele ebandla indaba kaMnangagwa esithi abesifazana sebefuna ukuthi kube lomunye wabasekeli bakamongameli ongowesifazana.
Abantu abasemkhosini wePresidential Youth Interface Rally
Uthe sebesifuna isikhundla esatshiywa nguNkosikazi Joice Mujuru, owaxotshwa kubandla leli esetheswa icala lokuthi wayefuna ukususa uMugabe esikhundleni okungekho emthethweni,
Unobhala jikelele wohlangothi lwabasakhulayo kubandla leli, uMnu. Kudzayi Chipanga, usekele okwethulwe ngumongameli loNkosikazi Mugabe esithi sokumele kuguqulwe isisekelo sombuso webandla leli ukwenzela ukuba kubelowesifazana ozasekela uMugabe.
Kasenelisanga ukukhuluma loMnangagwa ngodaba lolu.