Umkhokheli wesonto yeAnglican ezansi yezwekazi leAfrica uArchbishop Thabo Makgoba sekhuthaze uMongameli Mugabe ukuthi angenele kungxabano ekhona kulisonto eZimbabwe amise ukuhlukuluzwa kwalabo abaphikisana loNolbert Kunonga.
UKunonga wayengumkhokheli walisonto eHarare kodwa waxotshwa ngokusekela ibandla leZanu PF. Inkuthazo kaArchbishop Makgoba ilandela ukuchithwa komhlangano wabakhokheli beAnglican elizweni abasekela osenguBishop weHarare, uChad Gandiya.
UGandiya ukhethwe yisigodlo salinkonzo ukuthatha intambo kulandela ukuxotshwa kuka Kunonga. Lokhu kubangele ukufuthelana kucele likaKunonga lona elihlezi livimba elikaGandiya ukuthi likhonze eHarare.
Amapholisa avimbe umhlangano wangoLwesibili esithi uGandiya labanye bakhe bebengela mvumo yokwenza lumhlangano.
Abenkonzo le bathi lokhu kuveza sobala ukuthi ukuhlukuluzwa kwabo ngamapholisa encedisana loKunonga kuyaqhubeka. Ngalokho, uArchbishop Makgoba uthi uMugabe kumele amise amapholisa loKunonga ukuhluphana lecele likagandiya.
Ngomnyaka odluleyo uMugabe uthembise ukuba uzangenela kuloludaba ngemva kokuhlangana lomkhokheli walinkonzo eCantebury kweleBhilitani, uArchbisop Rowan Williams.