Ibandla leZanu PF likhangelelwe ukuthi lizakwenza umhlangano oqakathekileyo ngeSonto wokuzama ukususa uMongameli Robert Mugabe esikhundleni.
Yizo, yizo ...
Umhlangano lo uzakwenziwa ngesikhathi abantu abanengi okumangalisayo betshengisele ezitaladini eHarare bayafika eState House lapho okutshiywe khona incwadi yokuthi uMongameli Mugabe sokumele atshiye umsebenzi.
Ibandla elibusayo likhanya selivumelene ukuba uMugabe asuswe esikhundleni kufakwe umuntu ozasebenza kahle labanye. Lokhu kulandela ukuxotshwa kuka Mnu. Emmerson Mnangagwa obelecele leZanu PF elibizwa ngokuthi yiTeam Lacoste ebelifuna ukuthi athathe isikhundla sikaMugabe engasuka embusweni.
Bekulabantu abanengi okumangalisayo ngoMgqibelo abatshengisele ezitaladini eHarare besithi sokwanele okukaMugabe.
Kodwa-ke elinye njalo icele elibizwa ngokuthi yiGeneration 40 belifuna uNkosikazi Grace Mugabe athathe isikhundla lesi.
Lokhu kuzondiwe abalwa impi yenkululeko ababambane lebutho ngoLwesithathu ibutho lahluthuna intambo zombuso.
UMnu. Daniel Sigauke, okubandla leli, uthe kukhangelelwe ukuthi bonke abazangena umhlangano lo bevumelane ukuthi uMugabe kaphume esikhundleni.
Omunye njalo okubandla leli, uMnu. Alois Baloyi, uthe udaba lolu lungacina luhanjiswa edale lephalamende nxa uMugabe engafuni ukusuka esikhundleni.
Bakungakhethwa mhlobo ...
Kusenjalo, inhlanganiso yeSouthern African Development Community ikhangelelwe ukuthi izakwenza umhlangano omkhulu wokuhlaziya udaba lweZimbabwe.
Inhlanganiso le kayifuni amabutho angenele kwezombusazwe.