Ibandla leZanu PF esabelweni seMashonaland Central lithi abasekeli bomongameli webandla leli kumele bakhethwe nguzulu.
Umgcinisihlalo webandla leli esabelweni lesi, uMnu. Dickson Mafios, uthi akulunganga ukuthi umongameli azikhethele abantu abafunayo njengoba okwamanje labo abakhethwa nguMongameli Robert Mugabe kukhanya bengamsekeli ikakhulu nxa ethethiswa nguzulu.
UMafios utshele iphephandaba leHerald ukuthi kumele kuguqulwe ezinye iziqondiso zesisekelo sebandla leli ezinika uMugabe amandla okukhetha abasekeli bakhe.
UMugabe wanikwa amandla la ngesikhathi seCongress yebandla leli eyenziwa ngomnyaka ka2014 kuze kuxotshwe owayengumsekeli wakhe uNkosikazi Joice Mujuru labanye bakhe abetheswa icala lokuzama ukukhipha umongameli esikhundleni.
UMugabe wakhetha uMnu. Emmerson Mnangagwa loMnu. Phelekezela Mphoko ukuba babe ngabasekeli bakhe.
UMafios uphinde wathi kumele ibandla le Zanu PF likhethe owesifazane ukuba ngomunye wabasekeli bakamongameli.
Ibandla lali likhangelane lokulwisana okumangalisayo kulabanye abafuna ukuthatha isikhundla sikaMugabe engasuka embusweni.
Sizalethulela okunengi ngaloludaba ngoLwesithathu.