Izakhamizi kanye labalwela amalungelo abesifazana labantwana sebeyamukele ukulawula komthethwandaba wokusetshenziswa kwesisekelo sombuso othe akusavunyelwa njalo kulicala emthethweni , ukwendisa kumbe ukuthatha umntwana oleminyaka engaphansi kwelitshumi lasitshiyagalombili.
Lumthetho oguqulwe ngemva kokuba abesifazana ababili abasakhulayo, oNkosazana Loveness Mudzure loRuvimbo Tsopodzi, bekhweze udaba lokwendiswa kwabantwana emthethwandaba lo bephathiswa ngamagqwetha agoqela uMnumzana Tendai Biti.
Olwela amalungelo oluntu, uNkosikazi Nonsikelelo Ndlovu Fayayo, uthi uyajabula ngalesi sinqumo ngoba siveza ukuthi umthethwandaba uzimisele ukuvikela abantwana akade besendiswa ngabadala abadinga imali kumbe bendiswe lapho bethe badlwangulwa.
Osekumele kwenziwe, uthi yikusebenzisa lumthetho ukuguqula impilo zamantombazana akade eseswela amathuba okuya esikolo ngenxa yokwendiswa esanuka uchango emakhaleni.
Umqondisi wenhlanganiso yokufundisa abesifazana ukukhokhela lokuzimela, iWomen In Leadership Development, uNkosikazi Samukeliso Khumalo, uthi inguquko le yamukelekile kodwa usakhangelele ukuthi imvumo yokuya emacansini layo ikhwezwe isuka kuminyaka engamatshumi lesithupha iye kutshumi lesitshiyagalombili, ngoba nxa umntwana esesemncinyane ukwenda kumele abe esesemncinyane lokuthatha isinqumo sokuya emacansini.
Abezokholo, uthi labo baseselomlandu wokukhuthaza abantwana ukuthi baziphathe bazigcine baze bende ngoba le yiyo yodwa indlela yokubavikela emikhuhlaneni lekuzithwaleni.
UNkosikazi Lydia Nyathi, osekhulile, uthi ngesikhathi yena ekhula kwakuyimvelakanci ukufundisa amantombazana ngoba kuthiwa kuthuthukisa umdeni lapho ayakwendela khona.
Uqhubeke esithi lumthetho muhle ngoba impumela yokungafundisi amantombazana isobala emizini eminengi lapho imuli ziqhubeka zilokhu zitshaya inja ngekhanda ngoba owesifazana ongafundanga njalo endiswe esesemncane eqhubeka laye engaqakathekisi imfundo yabantwabakhe.
Kungakabi lenguquko le, umthetho kuSection 22 (1) owe Marriage Act, ubusithi untombazana oleminyaka elitshumi lesithupha ulakho ukwenda okusemthethweni nxa umzali kumbe lowo omkhangeleyo evuma.
Umahluli uJustice Luke Malaba ehlezi labanye bakhe, unqume ukuthi umntwana kavunyelwa ukwenda kungakhathalekile ukuthi umzali wakhe uthini kumbe ukholo lwakhe ngoba isisekelo esitsha sombuso sivikela wonke umntwana ngokufanayo asilabandlululo.
Ukucubungula okwenziwa ngo 2014, kwaveza ukuthi amatshumi amabili lanhlanu ekhulwini – 24% lamantombazana aleminyaka elitshumi lanhlanu kusiya kutshumi lasitshiyagalolunye endile kuqathaniswa labafana phose okubili ekhulwini kuphela – 1.7% abaleminyaka efanayo.