Idale leHigh Court kweleSouth Africa ngoLwesibili lethule isinqumo esibamba ngamandla abatshutshisi ukuthi bacwayisisa amacala eziphathamandla zeZimbabwe ezingena kulelo lizwe ezetheswa amacala okwephula ilungelo loluntu.
Isinqumo lesi sethulwe ngumahluli uHans Fabricius, njalo sitsho ukuthi abacatshangelwa ukuthi balokwenza lokuhlukunyezwa kwabantu balakho ukubotshwa bathonisiswe nxa bathe bangena kweleSouth Africa.
Umqondisi wenhlanganiso yeSouthern Africa Litigation Centre, uNkosikazi Nicole Fritz uthi isinqumo lesi sizakwethusa labo ekade becabanga ukuthi ngeke babotshelwe ukuhlukuluza uzulu weZimbabwe.
Inhlanganiso yakhe ndawonye leyeZimbabwe Exiles Forum, zahamba emthethwandaba ziphikisana lesinqumo sabatshutshisi lamapholisa ababesala ukucwayisisa iziphathamandla zeZimbabwe okulobufakazi bokuthi zaphatheka ekuhlukumezeni abantu ngolunya.
Igqwetha uMnu Matshobana Ncube utshele lumsakazo ukuthi uyasemukela lesisinqumo, esithi ingqobe sikubagcini bomthetho kweleSouth Africa lohulumende walelolizwe ukuthi bavimbe kumbe ukubopha bonke abeZimbabwe abephula amalungelo oluntu nxa bethe bangena kulelolizwe.