Umkhokheli wabahluleli, uMahluli Godfrey Chidyausiku usengenele kudaba lokutshaywa lokungatshaywa kwabantwana ngoswazi nxa bewonile oluthethwayo emthethwandaba we Constitutional Court.
Kulexuku lamagqwetha alwela ilungelo loluntu elethula loludaba emthethwanda kulandela udaba lomunye osakhulayo ogwetshelwe ukutshaywa ngemva kokutholakala elecala lokudlwengula.
Amagqwetha la aphansi kwenhlanganiso ye Zimbabwe Lawyers for Human Rights.
Iphephandaba le The Herald lithi uChidyausiku uthi abantwana bangayekela ukutshaywa bazaswela imbeko njengalokho okwenzakala kwamanye amazwe abantwana abaza lemibhobho esikolo.
"Emazweni angavumezi ukutshaya abantwana balembeko na? Bangcono kulabethu na? Liyafuna na ukuthi abantwana baye esikolo lemibhobho lenqamu ezambeni zabo?" kutsho uChidyausiku.
Elinye igqwetha elilwela ukwesulwa kwesijeziso lesi, uMnu. Tendai Biti, ongumkhokheli webandla le PDP utshele iStudio Seven ukuthi amazwe womhlaba amanengi sewesula lesi sijeziso ngoba sisephula ilungelo likazulu.
"Isisekelo sombuso sikufaka sobala ukuthi wonke umuntu kumele avikelwe ilungelo lakhe engaphathwa butshapha. Ye lathi sakhula sitshaywa kodwa siyazi banengi abantwana ababhaxabulwa baze balimale abanye bacine sebefile," kutsho uBiti.
Sixoxe lowake wabangumbalisi, uMnu. Isaac Mpofu othi akumelanga lesi sijeziso sisuswe ngoba abanatwana bengonakala.
"Ibhayibhili lalo liyakufaka sobala ukuthi ukungafaki umntwana uswazi yikumona," kutsho uMpofu.
Your browser doesn’t support HTML5
Ingxoxo loMnu. Isaac Mpofu