Abasile kudlakela oluphathelene lezombusazwe, bathi amandla anikezwa umphathintambo wezokulondolozwa kokuthula lokuxolelana kayehliswe ukuze kungaze kwaphazamisa impumela yokucubungula kwezehlakalo ezehlukeneyo abahlangana lazo.
Abangene umhlangano wokuhlaziya phezu kokumunyethwe ngumthetho osekubunjweni iBill ye National Peace and Reconciliation, oqoqwe ngabenhlanganiso ye Heal Zimbabwe Trust, batshengise ukukhathazeka ngeziqondiso zale iBill besithi kaitsho lutho ngokuthi bazahlawulwa njani abahlukumezwe kudlakela lwezombusazwe.
Umnumzana Davie Ndlovu wase Tsholotsho, ongomunye wabahlukunyezwayo ngesikhathi sodlakela lombuqhazwe we Gukurahundi, uthi okumkhathazayo yikuba alufinyeleli kuzulu ulwazi lwaleBill oluphume kugwalondaba lukahulumende lwe Gazette mhla ka 18 Mpalakazi nyakenye.
Ngabe amandla kamphantintambo ayehliswa kancane ngesikhathi kuqhutshwa inhlolisiso yokuzwa ukuba kuyini okwenzakala ngesikhathi sezehlakalo zodlakela lwezombusazwe lezi njalo kusenziwa ngubani kutsho uNdlovu.
Umhlangano wokuhlaziya umthetho osekuninjweni owe National Peace and Reconciliation Bill
Okuyinto esekelwe nguNkosazana Memory Ncube ozalwa eLower Gweru kodwa ehlala eHarare, othi lanxa kukhona okuhle kule Bill, kunengi okusolisayo.
Kalicacanga kwezokuhlawulwa kwabahlukumezwayo njengaye, leli Bill kuveza uMaNcube.
Abahlukumezwa kundaba zezombusazwe laba bathi kumele bavunyelwe ukuzichaza izehlakalo ngokutsho okwenzakalayo ngowabo umlomo kanye lokuletha abafakazi hatshi ukuqina ngelokuthi kumele bazilobe phansi kuphela njengalokho okukuBill.
Bayakhalaza njalo abahlukuluzwayo laba bethi lingacaci leli Bill phezu kokuba kukhangelwa izehlakalo ezaba khona ngasiphi isikhathi, befisa zikhangelwe zonke, kungakhethwa ukuba ngezasiphi isikhathi.
Ingemukeleka li Bill ukuba ngumthetho olawula phezu kokungenziwa ukuzikhangela izehlakalo zodlakela elizweni,yikhona uzaqala umsebenzi we Commission eyakhethwayo ukubona ngezokukhumisana umlotha kanye lokuletha ukuthula elizweni ye National Peace and Reconsiliation.