Abamabandla aphikisayo labacubungula ezenotho sebesole umphathintambo obona ngezabatsha kanye lokuthuthukiswa kwabensundu kwezenotho uMnu Patrick Zhuwao ngemizamo yakhe yokufuna ukusungula umthetho obamba amankampani ngamandla ukubhadla imithelo yokudinga imali ezasetshenziswa kunhlelo zentuthuko yabensundu.
UMnu Zhuwao utshele iphephandaba leHerald ukuthi phansi komthetho lo, amankampani angakalandeli umthetho weIndigenization azabanjwa ngamandla ukubhadala umthelo ofika kusilinganiso sokulitshumi ekhulwini.
Ibandla leMDC elikhokhelwa nguMnu Welshman Ncube lisole kakhulu imizamo kaZhuwao lisithi izadiliza amankampani amalutshwane aseleyo nfemva kokuvalwa kwamanengi ikakhulu edoobheni lakoBulawayo.
Umbono weMDC lo ugcizelelwe yingcwethi ecubungula ezenotho uMnu Rejoice Ngwenya, yena othi kuyamangalisa okukhulunywa nguZhuwao ngoba amankampani awe Indigenisation akhona awaziyo ngawalabo abazisebenzayo, abaku Informal Sector labaphila ngokuthengithengisa ezithaladini.
"Abamankampani bakwamanye amazwe abalutshwana asebenelise ukusungula amanye eZimbabwe labo bazaze bacine bevalile besithi uhulumende uphonguhlala ehlabela ingoma yokuthathela abantu imithelo engapheliyo" kutsho uNgwenya.
Your browser doesn’t support HTML5
Ingxoxo loMnu. Rejoice Ngwenya