Abokholo lwesiKrestu eZimbabwe bamanyane lamazwe womhlaba ukusola udlakela oluqondiswe kuzizalwane zakwamanye amazwe ezise South Africa, bekhuthaza inkokheli zabohulumende ukuba ziphange ziwubhule lumlilo olakho ukuphazamisa ukuthula hatshi esigabeni sangezansi ye Africa kuphela kodwa lasezwekazi lonke nje labensundu.
Text:Ngenye yezingoma ebezihlatshelwa ngendlela ezwisa usizi ngokukhokhelwa ngumhlabeleli olodumo njalo engumfundisi ebandleni leZAOGA u Lawrence Haisa ngesikhathi kuqhutshwa umthandazo wokucela uNkulunkulu ukuba angenele kuzehlakalo zodlakela eziqondiswe kuzizalwane zakwamanye amazwe ezise South Africa osolubulele abantu abayisikhombisa okwamanje.
Lumthandazo wenzelwe eTrinity Methodist Church in Zimbabwe eHarare phansi komanyano we Zimbabwe Heads of Christian Denominations.
Inhlanganiso ezikulomanyano zibalisa eye Zimbabwe Catholic Bishops Conference, Zimbabwe Council of Churches, Evangelical Fellowship of Zimbabwe kanye leye Union For the Development of The Apostolic Faith in Zimbabwe – UDACIZA.
Umkhokheli weEvangelical Fellowship of Zimbabwe – EFZ, ongumfundisi njalo we Faith Ministries umnumzana Shingi Munyeza, utshele intathelizindaba ukuba kungumthwalo wenkokheli yeZimbabwe kanye leyezwekazi leAfrica ukunakekela izizalwane zazo ngokuthuthukisa inotho yamazwe la ukuze inani labantu abaphuma besiyadinga ukuziphilisa kwamanye amazwe lehle ngoba bexotshwa yisimo esibi somnotho lesi besiyaphathwa njengezigqili kwamanye amazwe.
UMunyeza uthi imbangela yolaka lukazulu weSouth Africa, yikuba kazipholiswanga inhlungu ahlangana lazo ngesikhathi somzabalazo, osekuvuka ngendlela yodlakela oluqondiswa kwezinye izizalwane zasezwekazi leAfrica.
Unobhala jikelele wenhlanganiso ye EFZ, umfundisi Lindani Dube, uthi okufuqe umanyano wabo yikuba kuqhutshwe umthandazo, kusolwa izehlakalo zodlakela ezenzakala kwele South Africa.
U Dube usekela umbono wezinye inkokheli, ekhuthaza ukuthuthukiswa komnotho wamazwe awezwekazi le Africa okuyibo asebesabalala besiya kwamanye amazwe hatshi e South Africa kuphela, kodwa lathuthukileyo angentshonalanga, ukuyadinga ukuziphilisa.
Wengeza ethi sekumele inkokheli esigabeni sangezansi kwezwekazi le Africa, zizinuke amakhwapha, zizibuze ukuba kungaphi lapho ezilahleka khona.
Unkosikazi Ephy Shava wase Vainona njalo elilunga lebandla le Methodist Church in Zimbabwe, laye ubekulomthandazo.
Uthi kumele kungapheleli ekuthandazeni kuphela kodwa kuthathwe amanyathelo wokuluqeda loludlakela njalo labaphindela ekhaya batholiswe usizo olwaneleyo ukuze bahlaliseke enqondweni.
Inkokheli kulommbuthano zivumelene ukuba lanxa sincomeka isenzo sikahulumende sokusa abalondoloza ukuthula okubalisa amapholisa lamasotsha ukuyabhula umlilo, zikhuthaza inhlanganiso ezilwela ilungelo loluntu kanye labamabandla ukuba bamfuqe uhulumende ukudinga indlela ezizaphathisa ukuluqeda kokuphela loludubo, lungaze lwavela njalo esikhathini esizayo.
Ungenwe ngabezokholo, inengi kungabesifazane, amalunga enhlanganiso ezilwela ilungelo loluntu lanxa ebengekho amalunga kahulumende kanye labamabandla akhokhelwa ngamaProfita akulezi nsuku.
Lengoma ebezihlatshelwa beziveza indlela uzulu weZimbabwe ephatheke kubi ngayo phezu ngezehlakalo zodlakela esezivelele izizalwane zakwamanye amazwe zonsundu ezise South Africa.