Intathelizindaba zeZimbabwe zimelwa ngabehlanganiso elwela amalungelo entathelizindaba eye Media Institute of Southern Africa – MISA Zimbabwe zise udaba lwazo emthethwandaba waphezulu owe Constitutional Court ngoLwesithathu, zifuna ususwe kokuphela umthetho weCriminal Defamation, obeka umuntu umlandu wokhuluma amazwi ehlisa isimo somunye.
Igqwetha elimela inhlanganiso yentathelizndaba ye MISA Zimbabwe, umnumzana Chris Mhike, uveze ukuba abenhlanganiso le bakubone kufanele ukuthatha leli nyathelo, befuna lesi sinqumo kube ngesisebenzayo okugcweleyo kusetshenziswa isisekelo esitsha sombuso welizwe.
UMhike uthi abe MISA Zimbabwe bathi idale likubeke sobala ukuba uyasuswa lumthetho ngoba singekho isizatho sokuthoniswa kwalowo obikwa edale icala laloluhlobo esola njalo isigwebo sankona ngoba kuludaba olungalungisiswa kungazange kwayiwa emadale ukuthi luyethoniswa.
Lesi sehlakalo siza ngemva kokuba kulentathelizindaba ezikhalaze kwabenhlanganiso yeMISA Zimbabwe phezu kokugwenxana kokusetshenziswa kwalumthetho.
Abaphatha umsebenzi wokuthapha izindaba balijabulele lelinyathelo elithethwe ngabe MISA Zimbabwe ukusa loludaba edale laphezulu le Constitutional Court. Umnumzana Amos Maseko oyintathelizindaba esebenzela eHarare ungomunye wazo.
Uthi uMaseko enye yenkinga ilizwe libhekane layo yikuba uhulumende olikhokhelayo elobuqholo obedlulise amalawulo, engazilandeli izinqumo ezenziwa ngamadale njalo engayihloniphi laleyo mithetho ayibumbayo yena ngokwakhee.
Intathelizindaba ezise loludaba edale ziphansi kweMISA Zimbabwe, ngezibalisa umnumzana Nqaba Matshazi, u Sydney Size kanye lomnumzana Godwin Mangudya. Ukhona njalo ongasi ntathelizindaba kodwa eyisakhamuzi se Harare laye opahatheke kilo ukulusa edale laphezulu leli,umnumzana Roger Deane Stringer.
Zithi intathelizindaba lezi zifuna ugatsha lwemithetho, olokwethulwa kwemibiko lezemisakazo kanye lehofisi yegqwetha elikhulu likahulumende, bachaze ukuba kungani kuthiwa kawusekho emthethweni kukhangelwa isisekelo sombuso esidala kodwa ulokhe ulandelwa kwesitsha.