Abacubungula ezenotho bathi umphathintambo wezemali uMnu. Tendai Biti ukhangelelwe ukwethula kunsukwana ezilandelayo umbiko ophathelane lokusetshenziswa kwemali abuye aphume lamasu langendlela zokuthuthukisa ilizwe loba nje umumo okhona khathesi uveza ukuba inotho kayithuthuki njengoba abantu bemazweni besesaba uhlelo lwe Indigenization njalo lokuthi ilizwe libhekane lokusilela kwemali yokuthuthukisa inotho.
Ingcwethi lezi, ezigoqela uMnu. Eric Bloch lo Mnu. Masimba Kuchera, zithi uBiti ulakho ukuba lamaqhinga athize awokuthuthukisa inotho kodwa lokhu kungeke kwaletha umahluko elizweni nxa uMongameli Robert Mugabe engathethisa abamhlophe evula idale lephalamende.
Ingcwethi lezi ziphinde zathi inotho ingathuthuka kancane nxa uBiti engekela ukukhipha imithelo kuholo lezisebenzi ezithola amakhulu amathathu amadola eMelika ngenyanga.
U Kuchera utshele uGibbs Dube we Studio 7 ukuthi nxa lezizisebenzi zingekela ukukhipha imithelo yeholo ngenyanga zilakho ukuthuthukisa inotho yelizwe, ngoba ziyabe zithola imali enengi yokuyathenga izinto ezitholo, uhulumende athole imithelo yamasales tax enengi.
