Umgcinisihlalo wenhlanganiso yabalandeli beqembu lomdlalo wenguqu ele Highlanders esigodlweni eHarare uModern Sikhuthele Ngwenya useqalile ukukhankasela ukuba ngumsekeli kamgcinisihlalo weqembu le Bosso.
Umfoka Ngwenya wethulele intathelizindaba zemidlalo ugwalo oluqukethe imicijo elitshumi etsho izithembiso athi uzazifeza nxa engakhethwa ukuba ngumsekeli kamgcinisihlalo weqembu le Highlanders.
Limicijo igoqela ukutholela iqembu le Highlanders usekelo lwemali kwabezamabhizimisi, ukuthuthukisa ubudlelwano phakathi kwabasekeli kanye lenkokheli yeqembu kanye lenguquko okumele ibekhona kusisekelo sombuso eseqembu kulandelwa inkuthazo yenhlanganiso yenguqu emhlabeni jikelele eye Fifa.
Ngaphansi kwenkokheli kaNgwenya inhlanganiso yabalandeli beqembu le Highlanders eHarare iphathise kakhulu iqembu leli ngokulitholela indawo yokuhlala lezinye indingeko eziyabe zifuneka nxa lidlala esigodlweni njalo uNgwenya uthembise ukuba uzenza okwedlula lapho nxa engavotelwa kukhetho oluzakuba khona ngenyanga ezayo.
Ezinye izithembiso zikamfoka Ngwenya zigoqela ukuvuselela iqembu labesifazane ele Highlanders Royals kanye lokutholela amaqembu abasakhulayo awabafana usekelo lwemali.
UNgwenya uthi yena engangena esikhundleni uzakhuthaza ukuba inkokheli yeqembu yemukele indlela zakulezinsuku ezokuthumela imbiko ebulenjini ngoba ukungabi khona kwazo kudala ukuba abalandeli beqembu bakhohliswe ngosomangase.
Abanye abakhangelelwe ukuncintisana loNgwenya kumkhankaso wokuba ngumsekeli kamgcinisihlalo weqembu le Highlanders ngabagoqela ophethe lesisikhundla uMgcini Sibhalo Mpofu kanye losomabhizimusi uKenneth Mhlophe.
Olunye ukhetho okumele luqhutshwe kuqembu le Highlanders ngolokudinga umphathingcebo omutsha okuyisikhundla esiphethwe nguDonald Ndebele yena owathatha indawo kaJerry Sibanda owatshiya wayakhokhela iqembu le Bulawayo City.
Your browser doesn’t support HTML5
Udaba lwezemidlalo siluphiwa nguJoseph Njanji