Umphathintambo obona ngezemali uMnumzana Tendai Biti uthi ukuze umnotho we Zimbabwe uthuthuke kumele kube lokuhlaliseka kwezombusazwe ikakhulu kuhulumende womanyano.
Umnu. Biti uqakathekise imisebenzi yezokulima, ezemfundo kanye lezempilakahle kuhlelo lwakhe lokuhlela imali kahulumende yomnyaka ka 2011.
Intathelizindaba ye Studio 7 uMavis Gama ubika ukuthi uMnu. Biti wethule loluhlelo oluzasebenzisa iUS$2.7 billion ngomnyaka ozayo ekhangelelwe ukuthi ivele emthelweni etshiyeneyo.
Ilizwe likhangelelwe ukuthola njalo uncedo olungaba yizigidi ezingamakhulu amahlanu zamadollar eMelika (US$500 million) oluvela emazweni okuzenza ukuthi ilizwe likhangelele ukuthi lingasebenzisa imali engange US$3.2 billion ngomnyaka ka 2011.
Kusenjalo, intathelizindaba yethu uNothando Sibanda ubika ukuthi izakhamizi zako Bulawayo zamukele uhlelo lwe budget ngendlela ezitshiyeneyo.
Ezinye zithi ayizigcwalisanga izifiso zabampofu libudget.
Ukuthi sizwe okunengi ngebudget ka 2011, uGibbs Dube we Studio 7 uxoxe lengcwethi kwezenotho uMnu. Masimba Kuchera lo Mnu. Rejoice Ngwenya abathi uMnu. Biti ulakho ukwehluleka ukulufeza uhlelo lwakhe ngenxa yokudonselana kuhulumende womanyano.
Usethula uhlelo lolu, uMnu. Biti uphinde wathi umnotho welizwe uzathuthuka ngesilinganiso sokwedlula okuthoba munwe munye- 9.3 percent ngomnyaka ozayo kodwa lokhu kungaphazamiswa yibudlwangudlwangu elizweni.
