UMnu. Sibusiso Moyo, umphathintambo ohlangothi lukahulumende olubona ngokudlelana lamanye amazwe, kasekho.
Lokhu kwethulwe enkundleni yokuxhumana eyeTwitter nguMnu. George Charamba, isikhulumeli sikamongameli Emmerson Mnangagwa, othi uMoyo ubulewe yiCOVID-19.
UCharamba uthe uMoyo ubhubhele esibhedlela eZimbabwe.
UMnangagwa utshele iphephandaba leHerald ukuthi ilizwe lilahlekelwe kakhulu yikubhubha kuka Moyo, owalwa impi yenkululeko ekubutho leZIPRA.
UMoyo wangena kubutho lomanyano ibandla leZapu, eleZanu lele Rhodesia Front esevumelene ukubeka phansi izikhali.
Wazalelwa eMnene Hospital eMberengwa. Utshiye umkakhe, uJustice Loice Matanda-Moyo, labantwana ababili.
Akwaziwa ukuthi uzangcwatshwa nini.
Kusenjalo, uhulumende usebike ukuba uzancedisa umdeni wako muyi uKombo Moyana, owayengusibalukhulu webhanga leReserve Bank of Zimbabwe, obhubhe ngoLwesithathu.
Kudaba olufanayo, uNkosazana Fadzayi Mahere, obevalelwe enkambeni yamapholisa leChikurubi Prison esetsheswa icala lokuloba okuthiwa ngamanga enkundleni yeTwitter, kubikwa ukuba uselegciwane leCOVID-19.