Umongameli Jacob Zuma wakwele South Africa usexwayise labo abakhwezela udlakela olubhekiswe kuzizalwane zakwamanye amazwe ukuthi batshiyane lalowo mkhuba nxa bengafuni ukuya ejele.
Kuloludlakela sekubulewe abantu abahlanu, inengi labaleka emizini yalo. Loba kunjalo udlakela lolu luqhubeke luqhamuka kwezinye indawo zelizwe kungakhathalekile ukuthi amapholisa athi umumo usungcono.
Ekhuluma ephalamende ngoLwesine, uZuma usole kakhulu ukutshaywa lokuhlukuluzwa kwabantu bakwamanye amazwe okuqhubekayo kwele South Africa. UZuma uxwayise labo ababangela loludlakela ukuthi batshiyane lalowo mkhuba wathi nxa kungenjalo bazawukhomba olotshwala.
Amalunga amabandla aphikisayo kweleSouth Africa lawo asole kakhulu ukuhlaselwa kwabakwamanye amazwe akhuthaza uhulumende ukuthi enze konke okusemandleni akhe ukuqeda ukuhlasela lokhu.
Edolobheni leDurban esabelweni saKwazulu Natal izinkulungwane zezizalwane zakwamanye amazwe lezakwele South Africa bebefolile ezitaladeni zaleli dolobho besithi kawuphele umkhuba wokuhlaselwa kwabakwamanye amazwe.
Omunye wamakhosikazi kaMongameli Zuma uNkosikazi Thobeka Madiba Zuma laye ngomunye walabo abafole eDurban besithi umkhuba wokuhlaselwa kwabakwamanye amazwe kawuphele.
Abafolileyo laba bonke bebelizwi linye besithi phansi ngokuhlaselwa lokuhlukumezwa kwabantu.
Loba kunjalo ukuhlaselwa kwabakwamanye amazwe kuqhubekele phambili endaweni ezitshiyeneyo elizweni lamhlanje.
Edolobheni leGermiston eliseduze leJohannesburg, inengi lezizalwane zeZimbabwe lalo libambisane labanye abebebaleka besiyacatsha emapholiseni ngemva kokuqhamuka kwaloludlakela.
Isizalwane seZimbabwe umnumnzana Vusumuzi Ndlovu uthi sebephelelwe ngamacebo.
Edolobheni leBinoni amapholisa aze aphosa intuthu ehitshayo ukudiliza ixhuku lezizalwane zakweleSouth Africa ezidlula ikhulu abezilungiselela ukuyahlasela abakwamanye amazwe.
Esinye isizalwane seZimbabwe unkosazana Nokwethemba Masuku uthi ithemba labo seliseNkosini.
Kusenjalo abehofisi yommeli weZimbabwe kweleSouth Africa babikwa sebethumele isithunywa eDurban ukuyakupha usizo kuzizalwane zeZimbabwe esezibaleke emizini yazo.
Ngakolunye uhlangothi kulabeZimbabwe abathi bazafola kusasa belubhekise ehofisini yeZimbabwe kweleSouth Africa ukuyakhuthaza uhulumende wabo ukuthi angenele ekuhlukumezweni kwabo. EZimbabwe lakho kulamalunga edale lephalamende alubhekise esigodlweni sommeli weSouth Africa kulelozwe besiyakwethula insolo yabo ngokuhlaselwa kwezizalwane zakwamanye amazwe.