Ukubekwa kwamalunga ephalamende alitshumi lane ukuba ngabaphathintambo labasekeli kanye lokuguqulwa kwengatsha eziphethwe ngabanye kwamukelwe ngendlela ezitshiyeneyo abanye besithi kusizani ukusebenzisa abantu abavele besehluleka abanye besithi kuhle. Abavela emhlubulweni wemaNdebeleni leNkabazwe bathi kukhuthaza ukuphatheka kwabantu bonke elizweni ekukhokheleni hulumende.
Umongameli welizwe lamhla ubeke amalunga alitshumi lane kuzikhundla zengatsha ezitshiyeneyo kwathi abanye babo baguqulwa ingatsha abaziphetheyo.
Kulabo ababekwe lamhla kugoqela abathile abaphuma emhlubulweni wemaNdebeleni leNkabazwe ababalisa abamnumzana uObedingwa Mguni, uMakhosini Hlongwane, uAbednigo Ncube, owayekubutho uTshinga Dube kanye loNkosikazi Sithokozile Mathuthu.
Ingcwethi kwezokuhanjiswa kwembiko, uMnumzana Nhlanhla Ngwenya, uthi ukwengezwa kwenani labaphathintambo abavela emhlubulweni wemaNdebeleni leNkabazwe kuyancomeka ngoba ilizwe livele lidinga ukukhokhelwa ngabantu abavela emikhonweni yonke yelizwe.
Ukwenza kukamongameli uthi kutshengisa ukuthi uzama ukuthi aqede ukuxabana okukubandla lakhe kungakhanyi ukuthi yiliphi icele elilamandla.
Ekhuluma ngokubekwa kukaMnumzana Chris Mushowe kugatsha lokuhanjiswa kwembiko, uNgwenya uthi akulanhlelo kumbe inguquko ezakuba khona ngoba kulokhu kwahamba uSikhwicamfundo Jonathan Moyo bonke abalandelayo abalawo amandla okuguqula imithetho yoncindezelo ekhona.
Osakhulayo, uNkosazana Emma Ngulube, uthi akukho okunengi okuguqukayo lanxa umongameli angantshintsha abaphathintambo bakhe kodwa lanxa kunjalo uyancoma ukungeniswa kwabantu abatsha abafana laboMnumzana Hlongwane loPatrick Zhuwao okulakho ukukhuthaza abatsha ukuphatheka kwezombangazwe.
Ingcwethi ekucubunguleni ezombangazwe, uMnumzana Godwin Phiri laye ugcizelele ukuthi umongameli aphatheke ngakho yikulungisa ukuxabana okusebandleni lakhe, evala izikhenxe ukuze zingavuleki ngamandla.
Kungakho, inguquko ebekhona, uthi ayilani lokuthuthukisa ukuphathwa kwengatsha kodwa kujonge ukuqeda ukuxabana phakathi kwebandla lakhe.
Abanye abaguqulwe ingatsha nguMnumzana Obert Mpofu osuke kugatsha lwezemigwaqo waya kwezenotho, uMonica Mutsvangwa osengumsekeli wakhe kanye loHlongwane ongumphathintambo ongela gatsha oluqondane laye.
Your browser doesn’t support HTML5
Udaba Silethulelwa nguNothando Sibanda