UMongameli Mugabe ukhangelelwe ukuphenduka ekhaya yiloba nini evela kukhefu alithatha ekupheleni kwawo wonke umnyaka lemmuli yakhe.
Esiya kukhefu lakhe ngoMpalakazi uMongameli Mugabe utshiye ukudlephana kubandla lakhe leZanu PF kusiya phambili njalo uzathola kudlondlobala ngamandla ngemva kokuba owayeqoqa inhlelo zebandla lakhe, uMnu. Didymus Mutasa emethese icala lokwenza umhlangano we congress ongekho emthethweni.
Lokhu sekukhweze ukufuthelana kubandla. Abazi ngokwenzakala bathi uMugabe uzafika eguqula uluhlu lwabaphathintambo kuxotshwe abanye njalo abacatshangelwa ukuthi basekela uNkosikazi Joice Mujuru abafana loMnu. Sydney Sekeramayi.
Ukufuthelana lokulwisana lokhu kuphakathi kwamalunga asekela umsekeli kaMugabe uMnu Emmerson Mnangagwa labikwa ekucele likaNKosikazi Joice Mujuru.UMnangagwa yena uphume namuhla emaphephandabeni ethethisa uMutasa esithi uyaguna.
Lokhu kuza ngemva kokuba uMutasa esole ukususwa kwamalunga akucele likaMujuru ezikhundleni. Sixhume ingcwethi ecubungula ezombusazwe uMnu Zenzele Ndebele ukuze sizwe imbono yakhe ngaloludaba.