Umongameli Emmerson Mnangagwa uphawule ngokusemthethweni ngoMgqibelo uhlelo lokuthelezela olwe Bubi-Lupane Irrigation Scheme lolwe Lupane Water Supply, lapho okuhlanyelwa ingqoloyi lomumbu.
Ubekhatshwe ngumsekeli wakhe uMnu. Constantino Chiwenga, leziphathamandla zikahulumende ezibalisa oMnu. Richard Moyo, Owen Ncube Vangelis Haritatos, Raj Modi, Anxious Masuka, loNkosikazi Oppa Muchinguri-Kashiri, labanye.
IStudio 7 ixoxe loMnu. Richard Moyo, ongumphathintambo kahulumende eMatabeleland North, njalo engumgcinishlalo webandla leZANU PF kulesi isigaba, yena othi zinengi inhlelo zokuthelezela esezisunguliwe, ezizaphathisana lolwe Gwayi-Shangani Dam, ezikhangelelelwe ukuqeda indlala eMatabeleland lelizweni lonke.
Your browser doesn’t support HTML5
Ingxoxo loMnu. Richard Moyo
Wengeze wathi amanzi aphuma kuhlelo lwe Gwayi-Shangani Dam azaqala ukusetshenziswa ekupheleni komnyaka ozayo. Uqhubeke wathi uhulumende waqonqosela ukuthi izigaba zonke ziqhatshe abantu bezigabeni zeMatabeleland ukusebenza kumankampani aqhuba lezinhlelo njalo bayakulandela lokhu njengeziphathamandla zezigaba.
UMnu. Moyo ugcizelele wathi amankampani alelungelo lokuqhatsha omanjinela kumbe abanye abalamakhono athile abavela kwezinye izigaba nxa bengatholakali eMatabeleland, kodwa imisebenzi ephansi efana leyabo “general hands” kufanele iphiwe abantu abahlala kulezozigaba. Uthi imali yokuqhuba inhlelo ezinengi ivela kusikhwama sokuthuthukisa izigaba ese devolution funds.
Siphinde saxoxa loMnu. Velile Moyo, isikhulumeli sebandla leMthwakazi Republic Party, yena othi inhlelo lezi zithenjiswa abantu ukhetho solusondela njalo aziphutshi, kukanti aziphathisi abantu beMatabeleland.
Your browser doesn’t support HTML5
Ingxoxo loMnu. Velile Moyo