UMongameli Emmerson Mnangagwa uzizwele ngezakhe indlebe inhlupho ezibhekane labeZimbabwe ngemva kokuba abantu abakade bezencedisana laye ukuthanyela umuzi weKuwadzana, eHarare beqale ukuklabalala besithi bafuna inyama bekhalaza ngokuqonga kwendleko yempilo.
Lokhu kwenzakale uMongameli Mnangagwa ethanyela emzini weKuwadzana phansi kohlelo lwakhe alwenza ngensuku zakuqala zenyanga. Abantu baphonguvodloka bewuhlaba omkhulu umkhosi bememeza becela ukuba abasize kunhlupho ababhekane lazo.
Ekhuluma kulumbuthano uMnangagwa ukhuthaze abakade bekhona ukuba bame ukudla inyama ethi oDokotela bathi kayilungelanga impilakahle.
“Lifuna inyama? Imibhida ke? Odokotela bafuna lidle imibhida ukuze lihlale lingabantu abaphililelyo. Inyama ayilunganga bantu. Mina ngilalela oDokotela yikho ngizidlela imibhida.”
Engakaqedi ukukhuluma uMnangagwa uzulu uhle wakhala njalo ngokuswelakala kwemali yokubhadala indleko zezikolo, okulapho athembise ukuba izikolo zikahulumende azisoze zikhweze imbadalo.
“Ngibala emaphepheni uMinister uthi kabakhwezanga indleko zezikolo. Yikho engikutshelwayo bathi kabakhwezanga. Ngizathuma abantu bazwe iqiniso. Izikolo zikahulumende azizange zikhweze. Ngizwile izikhalazo zenu, esenyama lesezikolo. Sizakuyakukhangelisisa lokhu”
Ingcwethi ecubungula ezombusazwe uMnu Mlungisi Dube uthi okwenzakale namhlanje kuveza ukuba uzulu uthwele nzima kungakho usezimisele ukuthatha loba yiliphi ithuba ukumazisa uMongameli.
“Ukubana kube labantu abakhale ngalokhu, kumele ukuthi nxa uMnangagwa ehlakaniphile abone ukuthi indlela zimbi. Kuzakuba nzima ukuba abuse abantu abalambileyo, kungenza ukuba bagenqule umbuso wakhe, kananzelele.”
Lokhu kusekelwe ngu Mnu Nqgabutho Mabhena owebandla le Zimbabwe Communist Party yena othe njengebandla lokhu kutshengisa ukuba ilizwe sokumele libe lenkulumo ezibambekayo ukulungisisa indubo zikazulu.
“Lokhu okwenzakele ku Mongameli Emmerson kutshengisa ukuthi abnatu e Zimbabwe balambile, behluleka ukuhambisa abantwana esikolo. Selokhu wangena embusweni useyehlulekile ukulungisa uMnotho. Thina sithi uMonagmeli kumele abize i National economic dialogue ukwakha ilizwe”
Abasekeli bebandla le ZANU PF abakade bekhona exhukwini labantu abakade bekulolu hlelo bathi ukukhulumisana labantu okwenziwe nguMnangagwa kuveza sobala ukuthi ungumkhokheli olalela izikhalazo zabantu kungakho uzalungisisa izikhalazo lezi.
UMnangagwa ucele uzulu ukuba agcine imizi ihlanzekile wakhuthaza amakhansili ukuba afake amabin okufakela izibi ukuze kungabi lengcekeza ndawana yonke kuvimbe ukuqhamuka kwemikhuhlane emadolobheni.
Your browser doesn’t support HTML5
Udaba lwabatshele uMongameli Mnangagwa ukuthi bayalamba siluphiwa nguMlondolozi Ndlovu