Umongameli Jacob Zuma wakwele South Africa ulubhekisa kweBhilithane ngeviki ezayo ukuya hlangana leNdlovukazi uElizabeth wesibili.
UZuma ukhangelelwe ukukhulumisana lohulumende walelo lizwe ngodaba lwezijeziso ezafakelwa uMongameli Robert Mugabe labanye bakhe ekhuthaza ukuthi zesulwe.
Amazwe afakela uMugabe labanye bakhe lezizijeziso agoqela akumanyano we European Union, eleMelika, Australia lamanye. U Mugabe usethe ibandla lakhe alisoze ligcwalise isivumelwano sokubunjwa kukahulumende womanyano ese Global Political Agreement nxa lezizijeziso zingesulwanga.
Kodwa ibandla leMDC lithi umlandu wokuthi izijeziso zesulwe uqondane lamabandla wonke akuhulumende womanyano. NgolweSithathu abasakhulayo bebandla le ZANU PF abatshengisele edolobheni leHarare banike inhloko kahulumende uMnumzana Morgan Tsvangirai inyanga eyodwa yokuthi akhankasele ukwesulwa kwalezizijeziso, kumbe uzabheka lenkinga engakhulunywanga. I MDC ithi lokhu yikwethusela uTsvangirai.
UMnumzana Mqondobanzi Magonya yingcwethi ecubungula ezombusazwe. UMagonya utshele uBrenda Moyo weStudio 7 ukuthi ele South Africa njengomlamulankunzi kudaba lweZimbabwe lilomlandu omkhulu wokukhankasela ukuthi amazwe angentshonalanga esule izijeziso lezi.