Isiphathamandla sebandla leMthwakazi Republic Party uMnu. Partone Xaba umiswe phambi komthethwandaba kamantshi koBulawayo ngoLwesihlanu, edinga imvumo yokukhululwa ngemali yesibambiso kulandela icala aletheswayo elokubangela udlakela ngenyanga kaMabasa kungxabangxoza eyaqhamuka epulazini eNtabazinduna.
Ibandla leli lalisithi kufanele uMnu Floyd Ambrose asuke epulazini le Tabas Induna Farm e Nyamandlovu, ngoba ngelikaMnu. Brian Davies yena owalithathelwayo.
UMnu. Ambrose uthi wantshontshelwa imali njalo watshaywa ngamalunga e-MRP ngaleso isikhathi.
UMnu. Dumisani Dube, uthi balindele ukuzwa emapholiseni, ngamanye amalunga alelibandla angamatshumi amathathu lanye, agoqela umkhokheli walo uMnu. Mqondisi Moyo, etheswa icala elifanayo.
Your browser doesn’t support HTML5
Ingxoxo loMnu. Dumisani Dube
Kusenjalo ibandla leMDC Alliance lithi abasakhulayo abathathu ababotshwe ngoLwesine besola ikhomishini ebona ngokuqhutshwa kokhetho eyeZimbabwe Electoral Commission, sebetheswe icala lokuvimba amahofisi la. Babikwa betshone imini yonke ngolweSihlanue besesitokisini njalo bengetheswanga icala amagqwetha abo ezama ukuthi bakhululwe. Abathathu laba babalisa oMnu. Johannes Karichi, Chrispen Virwa loDenford Ngadziore ongukhansila.