Inkampani kaMnu. Obert Mpofu umphathintambo wogatsha lwezemigodi, isithole imvumo yomthethwandaba we High Court ukuthi ixotshe ibhanga elikhulu lelizwe iReserve Bank of Zimbabwe (RBZ) endaweni lapho ehluleke ukubhadalela umthelo okomnyaka wonke.
Imbiko etshiyeneyo ithi iTrebo and Khays Investments eka Mnu. Mpofu lomkakhe uNkosikazi Sikhanyisiwe Mpofu, inikwe invumo le ngu Justice Mafios Cheda onanzelele ukuthi iRBZ ilesikwelede se Trebo esedlula inkulungwane ezingamatshumi amathathu zamadola eMelika.
Ibhanga le RBZ ilamawofisi, imtshina ethize lendawo yokugcina izimota zenkampani eBelmont ko Bulawayo.
Loba nje uMnu. Sindiso Mazibisa omele linkampani eyalile ukukhuluma ngaloludaba, abazi ngokwenzakalayo emthethwandaba we High Court bathi linkampani ayikanikwa imvumo yokubamba impahla ye RBZ ukwenzela ukuthi ithole imali yayo.
UMnu. Kucaca Phulu ohlaziya ezomthetho wamankampani utshele uGibbs Dube we Studio 7 ukuthi uMpofu laye usebonile ukuthi iRBZ isiphelelwe ngumphako loba nje lelibhanga lilokhe libukwa libandla lakhe le Zanu PF ukuthi beliqhuba kahle umsebenzi kungaka bunjwa uhulumende womanyano.
