Umongameli wecele leMDC, uMnu. Morgan Tsvangirai namhla usole abasekeli bebandla leZanu PF ababikwa behlasele abasekele bebandla lakhe bababhaxabula kabuhlungu emuzini weBudiriro.
Abasekeli laba babikwa babephakathi kohlelo lokukhuthaza uzulu ukuthi alobisa lokuhlola amagama abo kuluhlu lwabalelungelo lokuvota eBudiriro lapho abahlaselwa khona ngabasekeli bebandla le Zanu PF.
Kodwa abasekeli laba bathi bamangaliswa yikuthi lanxa betshayiwe yibo ababotshwayo. NgoLwesine abanye babo basiwe emthwethwandaba lapho abahlawuliswe imali yesibambiso, ibail, eye $100 ngamunye.
NgoLwesine uTsvangirai ubesedlula eBudiriro wabizwa ngabasekeli bakhe bamcela ukuthi abakhulumise.
Inengi labasekeli laba libikwa laphephelela emuzini welunga ledale lephalamende, uMnu. Costa Machingauta lapho uTsangirai kade ekhona.
Abasekeli laba bethesa icala lokukhokhela ubudlwangudlwangu lobu umgcinisihlalo wabasakhulayo webandla leZanu PF, uMnu. Godfrey Gomwe. Kodwa ulandule lelicala.
Sixoxe lomsekele wesikhulumeli sebandla, uNkosazana Thabitha Khumalo ukuze sizwe okunengi ngaloludaba.