UMmnu. Edgar Tekere, owalwa impi yokukhulula eleZimbabwe njalo owake wasungula elakhe ibandla lezombusazwe eliphikisayo ele Zimbabwe Unity Movement-ZUM, kasekho.
Isikhulumi semuli yako Tekere, uMnu. Ibbo Mandaza uthi umuyi, obeseleminyaka engamatshumi ayisikhombisa lane, ubhubhe ngoLwesibili esibhedlela se Murambi Clinic, ngemva kokulwisana lesifo semvukuzane okweminyaka eminengi.
Umuyi waba yisiphathamandla se bandla le ZANU PF okwesikhathi eside, njalo waba ngumphathintambo obona ngamalungelo ezisebenzi ilizzwe lisanda kuthola uzibuse. Wehlukana lebandla leli ngenxa yokwehlukana kwembono njalo wancintisana lomongameli Robert Mugabe kukhetho lokudinga umongameli ngomnyaka ka 1990 kodwa wanqotshwa.
Lanxa umuyi wayesengasezwanani loMugabe, waloba ugwalo oluthi “Lifetime of Struggle” lapho aveza ukuthi uMugabe kasuye owabulala uMnu. Josiah Tongogara njengalokhu okucatshangelwa ngabanengi.
UMnu. Rugare Gumbo, isikhulumi sebandla le ZANU PF utshele iStudio 7 ukuthi ibandla lakhe lisahluza udaba lokuthi umuyi uTekere engaphiwa inhlonipho yokuba liqhawe lelizwe na.
Kusenjalo, uMnu. Max Mnkandla umkhokheli wenhlanganiso ye Zimbabwe Liberators’ Peace Initiative utshele uSithandekile Mhlanga weStudio 7 ukuthi umuyi uMnu. Tekere ufanele ukuphiwa inhlonipho yeqhawe lesizwe ngemisebenzi ayifezayo.