Owayengumkhokheli wecele leMDC, uMnu. Arthur Mutambara utshele intathelizindaba ukuthi usexotshe uMnu. Welshman Ncube kubandla leli.
UMutambara obekhatshwe ngowayengumgcinisihlalo webandla, uMnu. Joubert Mudzumwe emahofisini akhe akamsekeli wenhloko kahulumende eMunhumutapa uthi utshele uNcube ukuthi amise umhlangano wedale lebandla elimqoka ele National Council okhangelelwe ukwenziwa kusasa lapho okuzakhulunywa ngodaba lukaMutambara lokwalela esikhundleni sokuba ngumsekeli wenhloko kahulumende yena wala yikho emxotshile.
UNcube uhlangane loMongameli Mugabe behlaziya udaba lokwalela esihlalweni kukaMutambara ngolweSibili lapho uMugabe athe uzakhulumisana lenhloko kahulumende, uMnumzana Morgan Tsvangirai kuqala.
UMutambara uthe uNcube ujonge ukubhidliza ibandla yikho ethethe inyathelo njengomkhokheli webandla ukuxotsha uNcube.
Kunjalo nje, isikhulumeli sebandla leli kobulawayo, uMnu. Edwin Ndlovu
utshele iStudio 7 ukuthi uMutambara usetshenziswa yiZanu PF ngoba abanye
bakhe abahlamukela ibandla leli sebephumele egcekeni ukuthi sebengamalunga eZanu PF.
Silokhu sikudaba olufanayo, sixoxe lengcwethi ecubungula ezombusazwe, uMnu. Effie Dlela Ncube othi uMutambara usezaphelelwa ngumsebenzi.