Oqhuba inhlelo zokuqeqetsha abasakhulayo emdlalweni wenguqu uChamunorwa Maphosa uthi labo asebedlala kuzinga laphezulu kumele baphathise amaqembu amancane lapho abaqala ukudlala khona ukuze lawomaqembu athuthuke.
UMaphosa uleminyaka edlula amatshumi amabili esungule iqembu leTigers, lona eliqale lisaziwa ngegama elithi Makokoba City Warriors.
Sekulabadlali abanengi abasuke kuqembu leli baya kumaqembu amakhulu. Ngokunjalo, uMaphosa uthi iTigers idinga usizo lwemali lokunye okutshiyeneyo ukuze iqhubeke ikhiqiza abadlali abalohlonzi njalo ingatshabalali.
“Laba asebedlala kuPremier League mhlawumbe ngabe bayasincedisa ndawonye lamaqembu abawadlalelayo njengoba lawo esazi ukuba ayabuya azocupha kithi lapha," kutsho uMaphosa.
"Akubi njalo mhlawumbe ngenxa yesimo somnotho yikho kasisoze sibasole kakhulu kodwa besikhangelele ukuthi amaqembu amakhulu asiphathise nxa ethe athatha abafana bethu ukuze iqembu lethu liyale lilokhu likhona, sikhuphe abantwana kuzidakamizwa lokunye okungalunganga.”
UMaphosa uphe umzekeliso wabadlali abalodumo abakhulele ezandleni zakhe kuqembu leTigers.
Uthe, “NgiloGodfrey Makaruse, wasuka lapha, ngiloNqobizitha Masuku, wasuka lapha, wathathwa nguMethembe lapha esihlahleni lesi.
"Esithi kulohlelo esilalo kanti usethatha umntwana wahamba. Asizange sidele kodwa lanamhlanje silabantwana abayisithupha abadlalela iHighlanders kuPremier Soccer League.”
Abadlali abayisithupha abakhulunywa nguMaphosa laba bagoqela uPrince Ndlovu, Darlington Munkuli kanye loGillian Nyathi bona abatshengisa ukuba balekusasa enhle kakhulu emdlalweni wenguqu.
Iqembu leHighlanders libaphe amabhola ngemva kokuba beliphe labo badlali kanye labanye.
Ubudlelwano bukaMaphosa leqembu leHighlanders buqale ngo1974 ekufikeni kwakhe edolobheni lakoBulawayo evela eBuhera.
“Mina ngadlalela iMatebeleland High City. Iqembu leHighlanders lalithatha abadlali kuqembu leRed Seal kwasekusiba leqembu leMat High City okwakuyikho lapho okwasekusiya khona abadlali abasakhulayo abeqembu leHighlanders bengakadluleli kuqembu elikhulu leHighlanders,” kutsho uMaphosa.
UMaphosa useleminyaka engamatshumi ayisikhombisa lanye yokuzalwa njalo sowatshiyela owayengumdlali wakhe uWilmot Kwenda ukuba ngumqeqetshi weqembu leTigers.
Batholakala endaweni yeThabiso Youth Centre elokitshini leMakokoba njalo balamaqembu abasakhulayo amathathu adlala kusigaba seBulawayo Province Junior League Serie A.
Your browser doesn’t support HTML5
Udaba Siluphiwa nguJoseph Njanji