Umntaka Grace Mugabe, uRussels Goreraza, utholakale elecala lokubangela imfa yomuntu emthethwandaba eHarare. Intathelizindaba yethu uMavis Gama usethulela loludaba ngokugcweleyo.
UGorereza, ovume lelicala, uhlawuliswe amadola angamakhulu ayisitshiyagalombili (US$800-00 ), engehluleka ukuhlawula leyomali ulakho ukuhlala entolongweni okwenyanga ezimbili.
Esethula isigwebo sakhe edale eHarare lamuhla emini, umantshi uMnumzana Vakai Douglas Chikwekwe, uveze ukuba leso sigwebo sinikezwe u Goreraza ngemva kokuluhluzisisa udaba lwakhe kukhangelwa izizatho ezimbalwa okubalisa ukuvuma lelicala.
UChikwekwe wengeza ethi okunye okwenze,kulicala lakhe lakuqala uGoreraza,engazange amotshele idale isikhathi ngoba elivumile lelicala, waxolisa phezu kokwenza kwakhe njalo etshenise ukuzisola ngaleso senzo.
Umantshi uthi okunye akukhangelileyo kuyikuba u Goreraza etshengise engumuntu owehlukana lonkosikazi wakhe,elengane okumele inakekelwe kungakho engasazange agwebela ukuhlala entolongweni.
Okunye umantshi athi ukukhangelile phambilini kwesigwebo yikuthi bekungela bufakazi obanelayo bokuba uGorereza wayetshayela ngobutshapha igross negligence ngesilungu, athi kuyikho kwamsiza ekuthini angaze acitshelwa i license yakhe yokutshayela.
Lelicala lingene edale leMagistrate lamuhla ngemva kwengozi yemgwaqweni eyenzakala mhla ka 23 kunyanga kaNhlolanja kuwonalo umnyaka lapho uGoreraza,oleminyaka yokuzalwa engamatshumi amathathu lantathu – 31years,atshaya khona umuntu ongaziwayo emgwaqweni u Samora Machel, phakathi kwedolobha leHarare.
Ubengelagqwetha u Goreraza ngesikhathi emiswa phambi komthethwandaba njalo lentathelizindaba ziswele ithuba lokumthatha izithombe.
Ngakolunye udaba oluphathelene lezamabhizimusi, kulequla losomabhizimusi elivele kweleMelika ngaphansi kwenhlanganiso ye Corporate Council on Africa – CCA,elikuleli kuhambo lwensuku ezintathu ngenhloso yokwazwisisa isimo.
Leliqula liza kuleli ngokusebenzelana labenhlanganiso emanyanisa osomabhizimusi bamazwe omabili la, eye American Bussiness Association Of Zimbabwe – ABAZ. Umgcinisihlalo walinhlanganiso nguMnumzana Tinashe Rwodzi.
Emhlanganweni lentathelizindaba owenzelwe eweteleni ye Meikles Hotel lamuhla ekuseni, uRwodzi uveze ukuba ngokwakuqala ngemva kwesikhathi,ukwethekelela kuleli kwequla le CCA.
Okhokhela leliqula,engumqondisi njalo wenye yamankampani aphatheke kwezokulingiswa kwempahla esetshenziswa kwezokulima kweleMelika,uMnu. Philip de Leon, uveze ukuba inhloso yohambo lwabo kuyikuqinisa ubudlelwano kwezokuthengiselana phakathi kwamazwe womabili.
ULeon uthi abenhlanganiso yakhe, bayakuqakathekisa ukulondolozwa kwemithetho yelizwe okuzaphathisa ekuthini osomabhizimusi babe lesiqiniseko sokuba akukho okungaphazamisa imisebenzi yabo.
Leliqula liza livelela kweleZambia ngenhloso inye kunhlolisiso yabo phezu kwenhlangothi lapho kungasungulwa khona amabhizimusi.
Leliqula lingene imihlangano lohulumende, inhlanganiso ezimela osomabhizimusi kanye lenhlanganiso eziphatheke kumisebenzi yokusebenzelana lozulu – iCivic Society ngesilungu.