UMongameli Emmerson Mnangagwa ususe esikhundleni umholi webutho leAir Force, uAir Marshall Elson Moyo ngoLwesihlanu ngemva kokuba yena uMnangagwa ehluleke ukuya eVictoria Falls ngenxa yemibiko ebisithi kungenzeka kube lamabhombha athiywe amagcekeni endizamtshina.
Akwaziwa ukuthi lesi yiso yini isizatho esenze wathatha lelinyathelo.
Umsekeli kaMoyo uAir Vice Marshall John Jacob Nzvede nguye osephiwe lesisikhundla kusukela mhlaka 15 kulinyaka.
UMnangagwa ubekhangelelwe ukukhuluma emhlanganweni weInternational Energy Development Conference eVictoria Falls kodwa indizamtshina yakhe ibikwa ithole umbiko wamabhombha lo isemoyeni yasiphenduke ibuyela eHarare.
Umsekeli wakhe, uMnu Constantino Chiwenga, obikwa ehambe kuqala, nguye ocine ekhuluma kulumhlangano.
Isikhulumeli sikaMnangagwa uMnu George Charamba uthe abogatsha olulondoloza amagceke endizamtshina olweZimbabwe Airport Authorities baziswe ngabendizamtshina yeFast Jet ukuthi bathole incwadi ye-email ebisithi bekulabantu abahlose ukuhlasela kumbe ukubhomba emagcekeni endizamtshina ngoLwesihlanu.
Amagceke engizamtshina la agoqela eleJoshua Mqabuko Nkomo koBulawayo leleVictoria Falls Airport lapho uMnangagwa abezakwehlela khona.
UCharamba uthe ababona ngokulondolozwa komthetho labezomvikela baphezu kokuphenya loludaba. Uphinde wakhuthaza uzulu ukuthi engethuki.
Ukuhlaziya loludaba sixoxe lengcwethi kwezombusazwe uMnu Effie Dlela Ncube yena othi okwenzakeleyo lokhu yinto engavamanga eZimbabwe, futhi uthi iqiniso lakho lizavela ngemva kophenyo.
Your browser doesn’t support HTML5
Ingxoxo loMnu Effie Dlela Ncube