UMongameli Emmerson Mnangagwa uthi kumele intathelizindaba labasebenzela inhlanganiso ezizimeleyo besekele eleZimbabwe hatshi ukuhlala bechothoza kumbe bedlelana lezitha zelizwe, elithwaliswe nzima ngamanye amazwe.
UMnangagwa wethule amazwi la namuhla emathuneni amaqhawe eNational Heroes Acre, obekungcwatshwa uRetired Colonel Tshinga Dube, owalwa impi yenkululeko ekuviyo leZimbabwe People’s Revolutionary Army kumbe iZIPRA.
Uthe kumele belandele indlela umuyi ayesenza ngayo loba kwesinye isikhathi weyekhuluma iqiniso elethusayo emhlanganweni yedale lePolitburo, elabaphathintambo bakahulumende leleCentral Committee.
Burial of former freedom fighter Tshinga Dube at National Heroes Acre in Harare, October 9, 2024
“Ngikhuthaza abezindaba labanhlanganiso ezizimeleyo ukuba bengabokwehlukanisa uzulu weZimbabwe ngokubeka intanga zokuzondana ebantwini. Kasiqakathekise ukubambana lokuthula elizweni.”
Inkulumo kaMnangagwa le uyethule ngesikhathi kubunjwa iziqondiso zomthetho wePrivate Voluntary Organizations Act, ezilakho ukuba kumiswe ukusebenza eZimbabwe kwezinye inhlanganiso ezizimeleyo, okuthiwa zidlelana lamazwe entshonalanga ethesa eyinye inkokheli yebandla leZanu PF izijeziso zenotho. Intathelizindaba zithi amazwi kaMnangagwa alakho ukwethusa abathapha izindaba eZimbabwe.
Abalandeli beqembu leHighlanders baphelekezele umuyi
UMnu. Njabulo Ncube, umkhokheli wenhlanganiso yabahleli bezindaba eyeZimbabwe Editors Forum uthi akumelanga uMnangagwa ethusele intathelizindaba.
“Amazwi lawa alakho ukwenza ukuba abantu besabe ukubhala iqiniso lokutsho sibisili ukuba kuyini okwenzakalayo ngoba besithi bafuna ukumthabisa. Asomazwi asijabulisayo.”
Amazwi kaMnangagwa achothozwe njalo ngabakunhlanganiso ezizimeleyo. UMnu. Marvelous Khuluma isikhulumeli senhlanganiso yeCrisis in Zimbabwe Coalition ngomunye wabasole okwethulwe ngumongameli.
“Amazwi la alakho ukwenza ukuba kuqhubeke kusiba lokwesaba lapho sisenza umsebenzi wethu ngoba engafuni ukuchothozwa.”
UMnu. Devilous Nkomo okunhlanganiso yeCommunity Vibes laye uthi kuyethusa okukhulunywe nguMnangagwa.
Abantu abaphelekezele umuyi uTshinga Dube eNational Heroes Acre eHarare, October 9, 2024
“Thina sizwa sisiba lokumangala ukuba umsebenzi esiwenzayo okumele ubonakale njengendlela yokusekelana lohulumende usubonakala sengathi yilulwisana laye, amazwi la asitshiya simadolonzima.”
Ekhuluma eNational Heroes Acre, uMnangagwa uphinde wathi umuyi uDube wayesaziwa ngokukhuluma iqiniso.
“UDube yindoda eyayikhuluma iqiniso kwesinye isikhathi wayesitshela okunengi esengeke sikutshelwe loba ngubani kumihlangano yethu eye ZANU PF Politburo laku Central Commitee, wayengathikazi ukuba ungubani. Yayindoda elesibindi.”
Omunye njalo oncoma imisebenzi kamuyi nguMnu. Descent Collins Bajila, omele iLuveve-Makhandeni edale lephalamende.
Abantu abaphelekezele umuyi uTshinga Dube eNational Heroes Acre eHarare, October 9, 2024
“Wayengumuntu owayekhuza abantu kungelani lokuba basekela liphi ibandla loba abebandla lakhe wayebatshela iqiniso.”
UMnu Samuel Siphepha Nkomo owake wabangumphathintambo kahulumende uyakusekela lokhu.
“Lundoda wayelenhliziyo enkulu kakhulu. Elothando. Kodwa wayekwenza konke lokhu etshela abantu iqiniso.”
Banengi abantu abavalelise uDube. Bagoqela uMnu. Sihlangu Dlodlo, umqondisi weqembu lenguqu eleHighlanders.
“Njengeqembu leHighlanders silahlekelwe kakhulu, wayesinikeza konke esikufunayo njalo wayelombono efuna ukuba sithole usekelo kuhulumende.”
Umuyi owayesaziwa ngegama lokusoma elithi Cde Embassy Dube ngesikhathi sempi yenkululeko wazalwa ngomnyaka ka1941 eMatobo. Wayekudale leZIPRA High Command. UDube, obhubhele esibhedlela seMater Dei Hospital koBulawayo, ubelesifo sezinso.
SEE ALSO:
Udaba Esilwethulelwe NguMlondolozi Ndlovu