UMongameli Emmerson Mnangagwa uthi eleZimbabwe liqakathekisa ukulwisana lokukhudumala komkhathi - iclimate change - okubangela izulu lesikhukhula, isomiso, indlala lokunye emhlabeni wonke jikelele.
UMnangagwa wethule amazwi la namuhla emhlanganweni weConference of Parties kumbe iCOP29 oqhutshelwa eBaku kweleAzerbaijan.
Utshele abasemhlanganweni lo ukuba kuqakathekile ukuthi kusetshenziswe indlela ezinqabela ukukhudumala komkhathi.
UMnangagwa uthe, “Intuthu ehitshayo ilokhu igcwala endaweni yonke okwenza umkhathi ufiphale njalo lamanzi angahlanzeki. Kunengi njalo okwezemvelo okutshabalala sonke isikhathi okubanga ukuthi kube lendlala abantu abayizigidi lezigidi bephile nzima. Isikhathi sokwenza kancane kancane okufunakalayo sesedlule ngoba kumele sifeze zonke izivumelwano zethu.
"EleZimbabwe libhekane lempawu zokukhudumala komkhathi okugoqela isomiso esidalwe yisikhudumezi somkhathi ese El Nino esibangele isomiso esikhulu lendlala engakaze ibekhona elizweni. Isimiso lesi sesithwalise nzima abantu phose bonke eZimbabwe.”
UMnangagwa uqhube njalo umhlangano loMongameli Aleksandr Lukashenko wakweleBelarus. UMnangagwa loLukashenko bancome ubudlelwano bamazwe womabili besithi kumele lamanye amazwe kuzwekazi leAfrica adlelane leleBelarus lapho eleZimbabwe elathenga khona amathalakitha okulima lokunye. EleBelarus lemba amatshe aligugu eZimbabwe.
Kambe bunceda ngani ubudlelwano bakweleBelarus leleZimbabwe? Ukuze sihlaziye udaba lolu, sixoxe loMnu. Effie Dlela Ncube olwela ilungelo loluntu.