UMongameli Emmerson Mnangagwa namuhla uvule ngokusemthethweni umbukiso wokwenjiwa kwamatshe aligugu eZimbabwe oweMining Engineering and Transport Expo, i-Mine Entra 2024, koBulawayo lapho akhuthaze khona abenza lumsebenzi ukuthi basebenzise ulwazi lweArtificial lntelligence ukuze bathuthukise umsenzi wabo njalo bathole inzuzo ephezulu.
Efika ekuseni enkundleni yeZimbabwe lnternational Trade Fair, uMongameli Mnangagwa ubhode ebuka imitshina esetshenziswa ngabemba okutshiyeneyo lempahla abayisebenzisayo elomsekeli wakhe uMnu Constantino Chiwenga kanye leziphathamandla zikahulumende.
UMnangagwa uthe uhulumende wenza konke okusemandleni akhe ukuthuthukisa umsebenzi wokwenjiwa kwamatshe aligugu ukuze uhambelane lokwenzakala emhlabeni jikelele ngoba lolugatsha luletha imali enengi elizweni. Uthe kubalulekile njalo ukuthi abaphatheke kulumsebenzi basebenzise ubungcitshi bolwazi lwakulezinsuku obeArtificial Intelligence.
"Kini lonke elilapha kulo umbukiso labo bonke abukubhizimusi lezokwemba labalobudlelwano lezokwemba ngilikhuthaza ukuba liqale ukusebenzisa imitshina lenhlelo ezile Artificial lntelligence ukuze lihlale lithuthukile, lisebenzela endaweni ezihlanzekileyo lokuthola inzuzo eziphezulu kuhlanganisa lokungalahlekelwa yimali enengi ngemva kokutshala lapho okungelalutho khona."
Amazwi kaMnangagwa asekelwe ngumqondisi weZITF uMnu Nicholas Ndebele.
"Indikimba yethu iyatsho ngolwazi lweAI ngoba umhlaba jikelele ususebenzisa lolulwazi abantu emhlabeni sebelusebenza njalo luyehlisa ukungcola luletha inzuzo lokuhlanzeka ngakho siyawusekela umbono kamongameli."
Lonyaka umbukiso weMine Entra ulamankampani akwamanye amazwe abukisayo angamatshumi phose amabili, 19, agoqela avela kweleChina, DRC, India lawaseSouth Africa. Aqala ukuzoukisa adlula amashumi ayisikhomisa-77.
AweZimbabwe wona edlula amakhulu amabili alengxenye, 255. Nyakenye kubukise angamakhulu akuleli angamakhulu amabili lane.
Umqondisi wenkampani esebenzela kweleSouth Africa laseZimbabwe eyeShemax, eyiyo enqobe amankampani abukisayo avela kwamanye amazwe, uMnu Sheperd Chawira, uthi awulula umsebenzi wabo ngoba zinengi inkinga ababhekane lazo.
"Silenhlupho ezehlukeneyo esibhekane lazo ezibalisa ukungatholi kuhle imali zakeamanye amazwe emabhanga ukuhamba kwamandla kagesti lokuthi imali zethu zicina ziphela amandla zisemabhanga.
Umsebenzi wokwemba amatshe aligugu afana legolide ledayimana ubusenziwa kakhulu ngobaba okweminyaka leminyaka. Kodwa abesifazana labo sebewenza ngobunengi.
Omunye wabo obeseMine Entra nguNkosikazi Priscilla Masuku, ogebha igolide eGwanda, yena othi bacela ukuphiwa amathuba ukuze bathuthukise umsebenzi wabo.
"Sicela ukuvulelwa amaEPOs njalo.lohukumende sicela asincedise sithole imali yokuthenga imitshina emikhulu."
Osakhulayo uNkosazana Thubelihle Sibanda, laye ongene umbukiso weMine Entra ukhuthaze abatsha ukuba bangene kubhizimusi lokwemba ukuze bazithuthukise.
"Sikhuthaza abasakhulayo ukuba labo bangene kubhizimusi lezokwemba bayefundela ezokwemba lobanje kusasenzima ukuthola imali yokuthenga imitshina emikhulu kuthi lamabhanga alemigoqo ethile okwenza sehluleke ukuthi sithole imali yesikwelede sithenge imitshina yakulezi insuku yokwemba."
Umbukiso weMine Entra lonyaka uhamba phansi kwendikimba ethi, "Unearthing Success: The mining Value Chains, lnnovation and lndustrial Nexus."
SEE ALSO:
Udaba Esilwethulelwe NguAnnahstacia Ndlovu