UMongameli Emmerson Mnangagwa usedale inkulumo ngemva kokutshela usowabo wakweleRussia uMnu Vladimir Putin ukuthi eleMelika liqinisa amandla alo eAfrica ngokupha eleZambia imali njalo lisekela lelolizwe kuhlangothi lomvikela ngenjongo yokunyampisa iZimbabwe inhliziyo liyikhawulisa.
UMnangagwa wethule amazwi la ngoLwesine emhlanganweni awenze loPutin eSt Petersburg kweleRussia.
Emazwini akhe okucela eleRussia ukuthi lizetshala imali eZimbabwe lokuphathisa emizameni yokuthuthukisa umnotho, uMnangagwa uthe iMelika izonda ilizwe lakhe, wathi yikho nje isekela amazwe akhelane layo afana leZambia leMalawi.
Abanye abacubungula ezombusazwe bawasolile amazwi kaMnangagwa besithi ubengamelanga akhulume kanje ngelizwe elingomakhelwane.
Bathi njalo amazwi la aveza sobala ukuthi kukhona kaMnangagwa akulwayo lohulumende kaMongameli Hakainde Hichilema, yena owayengumkhokheli ibandla elaliphikisa kweleZambia wasenqoba owayenguMongameli uEdgar Lungu.
ULungu wayelobudlelwano obuqinileyo lebandla leZanu PF, lona elileziphathamandla esezike zichothoza uMongameli Hichilema zisithi udlelana loMnu Nelson Chamisa, owayekhokhela ibandla eliphikisayo eleCCC.
Isikhulumeli sikahulumende weZambia uMnu Cornelius Mwita utshele iStudio 7 ukuthi “kulusizi kakhulu nxa kuyikuthi ngempela uwatshilo lawamazwi uMnangagwa.”
Ukuhlaziya loludaba sixoxe lengcwethi kwezenotho uMnu Effie Dlela Ncube yena othi uMnangagwa ubengamelanga akhulume ngeZambia ngalindlela.
Your browser doesn’t support HTML5
Udaba Lwamazwi kaMnangagwa Ekhuluma loMongameli weRussia