Obengummeli we Hurungwe West edale lephalamende, umnumzana Themba Mliswa, uthi ukuthunjwa kuka Itai Dzamara, kungcolisa isithunzi sikamongameli Robert Mugabe ezikhundleni zokukhokhela inhlanganiso ezibalisa eye African Union leye Southern African Development Community – SADC ngakho kumele akhululwe ngokuphangisa. UMliswa uthi njalo uzancintisa kukhetho oluzayo lwama by – elections ngo Mabasa ezimele eHurungwe East.
Abazi ngokuthunjwa kukaDzamara uMliswa ubakhuthaza ukuba behlukane lalomkhuba ngoba sesedlule isikhathi sokwenza lokho, sekudinga umbuso wabanengi ovumela ukwehlukana kwemibono endaweni yokubancindezela kusetshenziswa indlela ezilihlazo.
UMliswa uthi akaboni liphumelela ibandla le Zanu PF kukhetho luka 2018 okuzadala ukubunjwa kukahulumende womanyano ngoba lingasoke libe khona ibandla elizanqoba ngendlela ezalipha amandla okubusa lilodwa. Ethi ngoba lelibandla lizaqhubeka lihlephuka lanxa umkholeli wayo umongameli Robert Mugabe onguye ozama ukulimanyanisa.
Wathi sezaguquka injongo ezayelwa empini zokuba abansundu bayikholise inotho yabo okungaseyikho njengoba isise zandleni zabalutshwana abalobuhwaba abangafuni abanye bahlale kuhle labo osekubangele ukungathuthuki komnotho ngoba laba bantu bephitsheke ngokuntshontsha becatshe ngagama lomhlangano.
Wathi uyakwamukela ukuxotshwa kwakhe kuZanu PF ngoba ubukhokheli uqobo bungelani lokuba umuntu ukubandla loba hatshi. Okudingekayo, uthi zinkokheli ezizinikele ukusebenzela uzulu hatshi amasela njengabanye abakhona okwamanje.
Okhokhela uhlangothi lwabontanga ebandleni le Mavambo/Kusile/Dawn elikhokhelwa ngu Dr Simba Makoni, umnumzana Stephen Sibanda, upha umbono wakhe phezu kwenkulumo kaMliswa le.
USibanda uthi lalokho osekusenzekala kulelibandla, inkokheli ezaxotshwayo, seziyichaya egcekeni imfihlo yonke, zivuma ukuba isimo somnotho elizweni asingamanga kuhle, yinto enhle ngoba iveza sobala lokho okuhlezi kukhulunywa ngabamanye amabandla, njalo kuyinto elungele isizwe esikade sakhalaza ngokwenza kwe Zanu PF.
UMliswa uveze njalo ukuba asebezisondeza duzane loMugabe bezenza abantu abalungileyo, yizo inyoka ngoba bengelani lokusebenzela uzulu kodwa befuna ukuzibuthanisela inotho, uzulu esidla imbuya ngoluthi.
Ethi lokhu yikho okuzabangela ukuphuma ebukhosini kwebandla le Zanu PF ngoba uzulu engajatshuliswa yisimo somnotho elizweni inkokheli ingenzi lutho ukulungisisa amaphutha.