Nxa abalimi bekhuluma ngomquba kumbe imvundiso inengi licabanga ukuthi ngumquba otholakala kuzifuyo ezifana lenkomo kumbe imbuzi njalo abanye bathi yi-fertilizer ethengwa ezitolo.
Isikhona eyinye imvundiso lemithi ebulala izinanakazana ezihlasela izilimo - umthambiso womvundla.
Umlimi omkhulu koBulawayo uMnu. Million Moyo ulohlelo lokulungisa imvundiso ngomthambiso womvundla epulazini lakhe. Uchaza ukuthi imvundiso le yenziwa njani.
"Kuthwa yi-organic fertiliser, yi-fertiliser engela synthetics ayisiyo fertiliser emanufacture emafactory esiyizondayo kakhulu ngenxa yokuthi iletha imkhuhlane, bonke ocancer laba worldwide kucatshangelwa ukuthi kuvela emafertiliser asetshenziswayo. Lokhu ku-organic ngoba umvundla siwunika utshani lamanzi kuphela lamapalets abe yenziwe ngezinto ezi-natural okungafakwa chemical, leyi mvundiso yi-fertiliser."
TEXT: Umthambiso womvundla bayawukhongozela ezibayeni. UMoyo uthi abalimi abanengi sebefuna wona ngoba bathi uyabasebenzela kuzilimo zabo.
"Umvundla nxa uthambisa uchema kuyajuluka kuyengale njengamanzi ezulu ejuluka endlini kubesekubanjwa ngama gutter kujuluke siyeku collector ngemva ngale sibe sesifaka kuma container uyawu dilutor ngamanzi nge ratio 1:5. Siwuthengisela abanye labo abalimayo asebavusa amehlo babona ukuthi yinto esebenzayo. It's far cheaper as well.
Abalimi bathi umthambiso womvundla uyimvundiso ekhulisa kuhle izilimo zabo. UNkosikazi Vulisiwe Dube ngomunye wabalimi abasemenzisa imvundiso le.
"Sisebenzisa irabbit urine. Isenzela kuhle kakhulu kuma vegetables ethu, ezihlahleni zethu lakuma fruits ethu wonke. Irabbit urine leyi yenza ama vegetables ethu abelomehluko lalawa amanye asebenzisa ifertiliser ngenxa yokuthi abantu bathi ayahlabusa."
Ngaphandle kwalokhu, kulabantu abanengi asebethakazelela inyama yomvundla. UNkosazana Gugulethu Nkiwane ulomkulu wokupheka ethengisa ukudla koBulawayo, uthi abantu sebethanda inyama yomvundla.
"Ngipheka izitshwala nje yonke into ehlangahlanganeyo kodwa sengi introduce inyama yomvundla. Inyama leyi siyaxaba, siqale siyixabe kahle nje iphele lesiyana ismell sibe sesiyayiwosa siyipheke nje ngendlela ezehlukeneyo. Abantu kulez’insuku bayayithanda and yiyo ehambayo kulezinsuku."
Omunye othanda inyama yomvundla nguMnu. Sam Dube ohlala eEsigodini.
"Uyazi inyama yomvundla imnandi okwamagama. Ifuna nje ukuphekwa kuhle mina vele angisadli ibeef sengiphila ngokuthenga umvundla, ngiwuxabe kamnandi besengizidlela ngesitshwala sami samabele. Into engithabisayo yikuthi sokulama restaurant athengisa inyama yomvundla, sokumnandi okwamagama."
UMoyo uthi abalimi kabangakhathezeki ngoba sesefikile isikhathi sokusebenzisa umthambiso womvundla ukwenzela ukulima okungagugudekisi umhlabathi. Kusenjalo, uzulu ukhuthazwa njalo ukuba adle inyama yomvundla okuthiwa iyahlabusa okwamagama.