Kube yisimanga esikhulu kuzulu wako Bulawayo ngoMvulo obone inkalakatha yesikepe esilungiswe eHarare yinkampani yeGDI Boat Manufacturers.
Isikepe lesi besikuhambo lokuya eKasane emngceleni weNamibia, Botswana leZimbabwe lapho esizasetshenziswa khona.
Umsebenzi uke wama mpo koBulawayo ngesikhathi isikepe lesi sidonswa yimota enkulu edolobheni lakoBulawayo.
Ekhuluma le Studio 7, umasilungisa isikepe lesi, uMnu. Forbes Hwatira, uthe sibathethe inyanga ezilitshumi ukusakha.
Omunye wababukele lesi simanga nguMnu. Maxwell Sibanda othe lokhu kuyajabulisa kakhulu ngoba kuveza sobala ukuthi ilizwe lingalunga.
URicky Moyo, omunye laye obebabaza isikepe lesi, ugcizelele esithi lokhu kuveza ukuthi ilizwe liseselabo ubungcitshi bokuthi libuyele esimeni salo sokuba lamakampani alungisa izinto ezilohlonzi ezingaqinisa umnotho welizwe.
Isikepe lesi ngobukhulu baso nxa sihamba emgwaqweni siyabe sivimbe indlela zonke okuyikho okwenze ukuba sisebenzise umgwaqo weMasvingo ngoba singenelisi ukuhamba kumaround about asendleleni ye Gweru.
Amakampani amanengi aweZimbabwe awasasebenzi kahle ngenxa kokuswelekala kwemali elizweni.
Inengi lamakampani ayesebenzela koBulawayo se avala okwenza ukuthi uzulu waleli dolobho aswele imisebenzi.
Your browser doesn’t support HTML5
Abantu Abanengi Babuke 'Umkhumbi KaNoah' Odlule koBulawayo