Umkhokheli webandla leZapu uMnu Sibangilizwe Nkomo uthi kumele kubunjwe umthetho owenza kube licala ukubandlulula abantu ngemihlobo eZimbabwe, okuyinto athi yenziwa kakhulu libandla elibusayo eleZanu PF.
Kumbiko wakhe oqondane lomnyaka omutsha, uNkomo usole iZanu PF esithi yabunjwa phezu kwesisekelo sobandlululo futhi yehlukanisa abantu beZimbabwe ngemihlobo ngokubandlulula ikakhulu abantu besiNdebeleni leminye imihlobo yesiShoneni.
Ngakho, ukhuthaze abantu ukuthi bafunde indimi ezehlukeneyo emnyakeni omutsha ukuze bazwisisane enkulumeni njalo balwisane lobandlululo ngoba lubulala isizwe.
Esipha umzekeliso wobubi obulakho ukuphehlwa lubandlululo, uMnu Nkomo uthe ukubulawa kwabantu besiNdebeleni abedlula inkulungwane ezingamatshumi amabili, 20,000, yiGukurahundi kwaphehlwa yinzondo lobandlululo.
Your browser doesn’t support HTML5
Ingxoxo loMnu Sibangilizwe Nkomo
Kodwa ilunga leZanu PF uMnu Joseph Tshuma, okuCentral Committee yalelibandla, ukulandule okukhulunywa nguNkomo esithi ibandla lakhe liyamanyanisa abantu, hatshi ukubabandlulula.
Your browser doesn’t support HTML5
Ingxoxo loMnu Joseph Tshuma