Ngqwele Dube
Izakhamizi lezi zithi izifuyo ezingakacubi sezisidla umkhawuzane owaziwa ngeSilungu ngokuthi yiDichapetalum Cymosum. Okuyisihlahla lokhu kukhanya ngokuphangisa ukukhula kube luhlaza tshoko okwenza kukhange izifuyo ukuthi zikudle.
Abakuhlangothi lukahulumende olubona ngezokulima olweAgricultural Extension Services eMatabeleland North bathi umkhawuzane usubulele inkomo ezinengi esabelweni lesi okwedlula iminyaka edluleyo ngenxa yesomiso esikhulu esidalwe yisikhudumezi somkhathi ese El Nino.
Umkhawuzani lo ubulala inkomo lembuzi esabelweni lesi, okufe inkomo ezinengi ngenxa yokuswelakala kwamadlelo lamanzi.
UNkosikazi Florence Tshuma uthi usephelelwe zinkomo.
Local plant kills cattle in Tsholotsho, Matabeleland North.
“Ngifelwe yinkomo ezingu10. Kwaqala one kwalandela ezimbili then ngathola four kwalandela ezinye ezingu four. Umkhawuzane yisihlala esililuba esimila egangeni esiyingozi kakhulu kuzifuyo ikakhulu inkomo."
UMnumzana Jethro Sibanda, ofelwe yinkomo eyodwa ukhala ngesihlahla lesi.
“Umkhawuzane lo yiwo esicabangela ukuthi ungabe usibulalele inkomo umkhawuzane ufana lezinye izihlala so inkomo ingalamba iyawudla isithi yisihlahla nje."
Local plant kills cattle in Tsholotsho, Matabeleland North.
Abohlangothi lukahulumende olubona ngezokulima bakhuthaza abalimi ukuba beluse izifuyo ngoba kunzima ukwenqabela ukuthi zingadli umkhawuzani. Kusenjalo, ezinye izakhamizi esigabeni lesi zithi kazikutholi ukudla okuholiswa nguhulumende. Omunye wabo nguMnu Caphius Sibanda, ohlala esiqintini seGombalume Line, kuWard 2.
“Kwabhalisa abalolutho ngoba abazange bevakatshele emizini babone ukuthi umuntu uphill njani. Asitholanga lutho siyamlupheka sibili siphakathi kwendlala enzima silabantwana abangu 5 kodwa asila kudla sesiphila ngokuthi umuntu angicele ngimbandele inkuni abesenginika i10kg siqhube ngayo”
Omunye njalo ongaholiyo nguMnu Muntukasolwa Ndlovu oleminyaka yokuzalwa engamatshumi ayisikhombisa lane - 74.
“Senglinde ukufa, silabantwana kodwa sebayenda sihlala lo gogo sibabili abantu abagugileyo asizuzi lutho kuhulumende, sikhuluma nje lonyaka sizwa abanye bethola lathi kuyasimangaza ukuthi kwenziwa njani lokhu”
ZIbulawa ngumkhawuzani inkomo eTsholotsho, Matabeleland North.
Banengi abakusimo lesi. UNkosikazi Londiwe Tshuma uthi babengalindelanga ukuthi kuzabhaliswa kanye kuhle kuvalwe.
“Esikubona lonyaka asikaze sikubone lokhe saba yithi. Sizwa kuma radio ukuthi abantu bayahola elaynini khonapha kumbe kuhola abantu abangu 10 kodwa wonke umuntu ukhala ngendlala asazi kuhamba njani sasala ekubhaliseni ekuqaleni kwahle kwahlala kunjalo kodwa babethe kuzaba lokubhalisa njalo”
Umphathintambo kahulumende Obona agenhlalakahle kazulu, uMnumzana July Moyo uthi abangatholi ukudla kumele babone induna zabo labo sobhuku, babhalise ngoba uhulumende walungiselela ukuthi inani labantu abadinga ukudla lizakhuphuka sekusondela uZibandlela womnyaka ozayo.
“UZibandlela lo Nhlolanja yizo inyanga okuyabe kule ndlala kakhulu khona, salungiselela ukuthi sizanika abantu abayizigidi eziyisitshiyagalolunye okwamanje sinike abayizigidi eziyisithupha.”
Uhulumende uthi loba wayelesifiso sokwabela abantu ukudla okuyisilinganiso sama tonnes azinkulungwane ezilikhulu lamatshumi phose amane, 139,834, banelise ukwaba ama-tonne acitshe abe likhulu lenkulungwane, 94,527 tonnes phansi kohlelo obeluqhutswa kusukela kuNcwabakazi kusiya kuMfumfu.
Inhlanganiso eyabela abalambayo ukudla eyeWorld Food Program ithi abantu abalambayo abadinga usizo lokudla oluphuthumayo eZimbabwe bayizigidi phose eziyisitshiyangalombili, 7,7 million. EleZimbabwe lidinga imali eyedlula kancane amabhiliyoni amathathu amadollar eMelika eyokuthengela abakamvayo ukudla.