Umfelokazi welunga leCCC elithunjwe ngoLwezi nyakenye lagongodwa phambilini kokhetho lwama-by-elections uMnu Tapfumaneyi Masaya, uthi ukhathazeke kakhulu ngokuthi sokwedlule inyanga ezintathu kungelamuntu osebotshiwe phezu kokubulawa komyeni.
UMasaya ubikwa wathunjwa ngabantu ababehlome ngemibhobho abacatshangelwa ukuthi ngabacuphi, amaCIO, kumbe amalunga ebandla leZanu PF mhlaka 11 ngoLwezi watholakala efile eHarare.
Ukubulawa kwakhe kwasolwa kakhulu zinhlanganiso ezinengo ezilwela amalungelo oluntu kanye lomanyano weUnited Nations, wona owaxwayisa uhulumende ukuthi aphenye loludaba kabanzi.
UNkosikazi Masaya utshele iStudio 7 ukuthi uhlukumezekile kakhulu ngokuthi ababulali bomkakhe balokhe bezihambela nje kanti lamapholisa lawo kabatsheli lutho ngokuphenya kwawo.
Unobhala jikelele wenhlanganiso elwela amalungelo oluntu eyeIbhetshu Likazulu uMnu Mbuso Fuzwayo uthi ukwehluleka kwamapholisa ukubopha ababulali bakaMasaya kuzeva sobala ukuthi abasolwa ngabantu abadlelana lohulumende.
Your browser doesn’t support HTML5
Ingxoxo loMnu Mbuso Fuzwayo
Isikhulumeli samapholisa uAssistant Commissioner Paul Nyathi uthe simtshayele ucingo ngaloludaba ngoMvulo.