Lokhu kuvele komunye wemihlangano enziwa ezigabeni ezehlukeneyo zelizwe ngabekhomishini yokukhumisana umlotha eye National Peace and Reconciliation Commission, eGweru ngoLwesithathu.
Umhlangano lo ubuyehlukile kweminye eyenziwe yile ikomishini koBulawayo laseLupane ngoba ungazange umiswe kodwa uzulu weNkabazwe laye uveze ukufuthelana ngezehlakalo zombuqazwe weGukurahundi, ukuhlukunyezwa ngesikhathi sokhetho luka2008, ukudilizelwa izindlu, imisebenzi yenkohlalakalo egcwele zonke ndawo, umbuso webutho kanye lokuswelekala kwemisebenzi ngabasakhulayo.
Umhlangano lo ungenwe ngabengatsha zikahulumende, izinduna, abamela izisebenzi, abasakhulayo, abesifazana, abalwa impi yenkululeko kanye lamabandla ezombusazwe.
Inengi kulumhlangano belikhala ngokuthi inkokheli zomdabu okugoqela izinduna labosobhuku yibo abadala ingxabano lokungezwani phakathi kweziqinti ngenxa yokubandlulula abantu kulandelwa ukuthi usekela liphi ibandla lezombusazwe.
Umnumzana Martin Ngwenya isakhamuzi saseGweru ngomunye ophe umbono wakhe kulumhlangano.
Umnumzana Silas Dube laye oyisakhamuzi seGweru uthi ikhomishini idlalisa isikhathi ngoba abantu abayibumbayo yibo abaphatheka kumbuqazwe weGukurahundi ngakhoke abasoze bavume ukuthi balamacala.
UDube uthi isikhathi likhomishini eqale ukusebenza ngayo asiqondanga ngoba kusobala ukuthi bazama ukuzisondeza duze labantu ngenxa yokhetho.
Unkosikazi Runyararo Chilenje omele inhlanganiso eye Zimbabwe Christian Alliance uthi izabelo zombili zeMatabeleland azitholanga amathuba okukhuluma njengalokhu okwenzakale eNkabazwe.UReverend Alleck lee Mtshikatshika uthi uhlelo lolu belungaba luhle kodwa uthi ukubonjwa kwekhmishini kwaphosiseka kusukela ekuqaleni ngokufaka abantu bomhlubulo owodwa.
Umhlangano waseNkabazwe lo uqhutshwe ngendlela ebilokuzwana phakathi kwabantu abazimisele ukuthi bazahlala lize litshone ilanga bethi abafuni kujahwa ukulandisa ubuhlungu beminyaka engamatshumi amathathu lasikhombisa.
Your browser doesn’t support HTML5
Udaba lwemihlangano yeKhomishini eyeNPRC eGweru siluphiwa nguBathabile Masuku