Abakhokheli bamazwe athuthukileyo aphansi komanyano weG20, abasemhlanganweni oqhutshelwa eBrazil sebekhuthaze amazwe omhlaba ukuthi asebenze ndawonye ekulwisaneni lobuyanga, indlala, ukuguquka komkhathi [climate change] kanye lokuqeda izimpi.
Umhlangano lo ungenwe ngabaholi abagoqela oweMelika uMongameli Joe Biden, UCyril Ramaphosa wakweleSouth Africa kanye loMongameli wakweleChina uXi Jinping.
Umanyano wezwekazi leAfrica oweAfrican Union lawo uphatheke emhlanganweni lo okwakuqala.
Ekhuluma ngoLwesibili uMongameli waseBrazil uMnu Lula da Silva ukhuthaze amazwe ukuthi athathe amanyathelo aqilileyo njalo aqoqe imali enengi ezasebenza kunhlelo zokulwisana lokuguquka komkhathi.
Inkuthazo le yethulwe ngabanye abaholi abatshiyeneyo abagoqela uMongameli Biden.
NgoMvulo umhlangano weG20 ukhuthaze iziphathamandla zamazwe omhlaba ezisemhlanganweni wokucebisana ngokuguquka komkhathi oweCop29 kweleAzebaijan ukuthi lazo ziphume lamanyathelo alohlonzi.
UMongameli Emmerson Mnangagwa laye uke waba semhlanganweni weCop29 kunsukwana ezedluleyo lapho ethule khona amazwi afanayo.
Okhankasela ukulondolozwa kwemvelo uMnu khumbulani Maphosa owenhlanganiso yeMatabeleland Institute for Human Rights utshele iStudio 7 ukuthi abakhokheli bezwekazi leAfrica labo bebodwa kumele baphume lezinqumo ezilohlonzi zokwenqabela ukuguduka komkhathi.
Your browser doesn’t support HTML5
Ingxoxo loMnu Khumbulani Maphosa