Inengi labaphathintambo bamazwe angamalunga e Southern African Development Community (SADC) ababona ngenhlelo zamanzi, sebefikile ko Bulawayo ukuzophatheka emhlanganweni oqala ngolweSine uphela ngolweSihlanu. Lumhlangano ngowokudinga amacebo wokuthi amazwe la angakha njani amanzi emfuleni u-Zambezi.
Ezinye iziphathamandla zalamazwe, ezigoqela ezivela kweleZambia, Tanzania, Mozambique, Democratic Republic of Congoa, Namibia, Zambia, le Angola bezivele sezikhona ko Bulawayo njalo ziqale ngoMvulo ukulungiselela umhlangano lo, owenzelwa eHoliday Inn yalelidolobho.
Umphathintambo kahulumende obona ngenhlelo zamanzi, uMnu. Sam Siphepha Nkomo ubelomhlangano lentathelizindaba ngolweSithathu emini, ezichasela ngalumhlangano.
UNkomo, utshele uSithandekile Mhlanga we Studio 7 ukuthi injongo yalumhlangano ngeyokulungisa inhlelo zamanzi emazweni eSADC, ngakho awuqondanga ukuzolungisa inhlupho zamanzi ezise Matabeleland kumbe elizweni jikelele .