Umongameli Mugabe usesole inkokheli yabasakhulayo esebenzise imali ukuthi ikhethwe emhlanganweni wokudinga inkokheli oyenzelwe eHarare ngeSonto.
UMnu. Kudzayi Chipanga nguye osekhethiwe ukuba ngumsekeli kanobhala wezabatsha ngemva kokungqoba uMnu. Tongai Kasukuwere. UChipanga nguye osezakuba ngumsekeli kaMnu. Absalom Sikhosana.
Esethula amazwi ache ngemva komhlangano lo, uMongameli Mugabe uthe kulenkokheli yebandla ekumadale amqoka alelibandla awe politburo lele central committee asebenzise imali yokufumbathisa abasakhulayo laba ukuthi bavote njani.
Phambilini kwalumhlangano, ngolweSihlanu, uMugabe usole amalungiselelo alumhlangano esithi bekungela ngitsho lokudla okucine kutholakala ngemva kokuba unkosikazi wakhe uGrace Mugabe ebaphe inkomo zakhe ezingamatshumi amathathu ukuthi zihlatshe.
Yena umongameli ubikwa ephe abaskahulayo laba kade besedlula inkulungwane ezintathu, 3 000, amabele lochago. Umgciningcebo webandla, uMnu. Didymus Mutasa ulandule ukuthi nguye owehluleke ukuqoqa lumhlangano.
UChris Gande weStudio Seven uxoxe lengcwethi ecububungula ezombusazwe, uMnu. Morris Ngwenya ongosakhulayo webandla leli othi lanxa bekulenxaki lapha lalaphaya lumhlangano uphumelele.
Your browser doesn’t support HTML5
Ingxoxo loMnu. Morris Ngwenya
Isisekelo sombuso webandla leZanu PF sithi unobhala nguye okhokheli uhlangothi lwabasakhulayo ongancintiswayo kukhetho.
Ukuhlaziya loludaba uChris Gande uxoxe lengcwethi kwezombusazwe, uMnu. George Mkhwananzi yena othi ukwehluleka ukuqoqa lumhlangano wabasakhulayo kutshengisa ukwehluleka ukuqoqa zonke inhlelo ezigoqela lokubusa ilizwe okwenziwa libandla le Zanu PF.
Your browser doesn’t support HTML5
Ingxoxo loMnu. GFeorge Mkhwananzi