Abampathintambo bamazwe abensundu baqale ukuhlangana ngenSonto eJohannesburg kwele South Africa emhlanganweni wokwandulela owenkokheli zamazwe abo wenhlanganiso yomanyano weAfrican Union.
Lobanje zizinengi indaba okuxoxwa ngazo kulo umbuthano izizalwane zeZimbabwe zona zithi zifuna kuqakathekiswe ingxoxo ngodaba lweXenophobia, umbuso ohlonipha intando kazulu lokuthi omongameli bengavunyelwa ukubusa okwedlula iminyaka elitshumi.
Umhlangano womanyano wezizwe zonke zezwekazi le Africa owe African Union, oqale ngeNsonto kweleSouth Africa uqhubekela phambili. Inengi yemihlangano kulo umbuthano ikhokhelwa yiziphathamandla zeZimbabwe njengoba umongameli Mugabe kunguye umgcinisihlalo wenhlanganiso ye African Union.
Lumhlangano oqhutshwa phansi kwesihloko esikhuthaza ukuthuthukiswa kwabesifazana, uqhutshwa ngesikhathi izwekazi leAfrica libhekane lenhlupho ezitshiyeneyo ezibalisa izimpi emazweni afana leSouth Sudan, ukuhlasela kwamalwecatsha emazweni afana leKenya, ukwalela ezikhundleni zombuso kwabomongameli abafana lo Pierre Nkurunzinza kweleBurundi, ixenophobia kweleSouth Africa, imikhuhlane, ubuyanga, kanye lokusilela kwemisebenzi eAfrica jikelele.
Inkokheli ze African Union zithi zonke lezi indaba kuxoxwa ngazo kulo umhlangano. Loba kunjalo izizalwane zeZimbabwe ezikweleSouth Africa zithi kulendaba ezisemqoka abafuna ziqakathekiswe.
Isizalwane seZimbabwe umnumnzana Bongani Ncube uthi njengezizalwane zeZimbabwe kabathokozi ngendlela ababuswa ngayo. Uthi kuqakathekile ukuthi kukhulunywe ngokuqhutshwa kwembuso ekhululekileyo ngoba yikho okubangela izimpi lokubhidlika kwezomnotho kuzwekazi leAfrica. Uthi njalo kundaba yexenophobia kufanele kuxoxwe ngokuthi lezo nkokheli ezilabantu bazo abanengi ababalekela kweleSouth Africa ziyabe zibenzeni okwenza bazonde amazwe abo ngalolo hlobo.
Esinye isizalwane seZimbabwe umnumnzana Busani Bhalagwe uthi okunye okufanele kukhulunywe ngakho kulo umhlangano ngumkhuba wokusetshenziswa kwenhlelo zikahulumende, amapholisa lamasotsha kujeziswa labo abangavumelani lombuso okhona. Lokhu uthi ngumkhuba hatshi oseZimbabwe kuphela kodwa lakwamanye amazwe kuzwekazi le Africa.
Umnumnzana Nkosini Tshuma yena uthi afuna ukukuzwa kulo umhlangano nyikuthi inhlanganiso ye African Union izakwenzenjani ngomkhuba osuvamile kwele Africa ukuthi umuntu angangena esihlalweni sokuba ngumongameli akasafuni kuphuma. Kuthike nxa kungaba khona abathi akahambe abadlise imbuya ngoluthi.
Uthi isibonelo esisemqoka kuloludaba yikunyamalala kwentathelizindaba yeZimbabwe uItai Dzamara, eyaduma kakhulu ngokukhuthaza umongameli Mugabe ukuthi akehle esihlalweni.
Inkokheli zamazwe eAfrica phansi kobukhokheli bukamongameli Mugabe zikhangelelwe ukuqhuba owazo umhlangano mhlaka 14 lo 15 Nhlangula lapho ezizathatha khona izinqumo ngendaba zonke okukhulunywa ngazo kulo umhlangano.