Amapholisa awe ZRP, aqhubeke evalele intathelizindaba ezintathu, zephephandaba le Sunday Mail, ezibotshwe ngoMvulo zisetheswa umlandu wokuloba indaba zamanga phezu kwezehlakalo zokubulawa kwendlovu endaweni egcinelwa inyamazana zendle eye Hwange National Park, lapho okugconwe esinye seziphathamandla zesipholiseni esingabethwanga ngegama.
Emhlanganweni lentathelizindaba owenzelwe ePolice General Heardquarters ngoLwesibili ekuseni, isikhulumeli samapholisa uSenior Assistant Commissioner Charity Charamba, uveze ukuba ukwenza kwabathathu laba, kuphazamisa uhlangothi lwezomvikela elizweni.
USenior Assistant Commissioner Charity Charamba emhlanganweni lentathelizindaba esigodlweni samapholisa ePolice General Headquarters eHarare.
Ababotshiweyo babalisa umhleli wezindaba, kuphephandaba leli leSunday Mail, uMabasa Sasa, ohlela indaba zokucubungula uBrian Chitemba kanye lolobe loludaba uTinashe Farawo.
UCharamba uthi loludaba lumangalise hatshi abasesipholiseni kuphela kodwa inhlangothi zonke zezomvikela. Waziqonqosela intathelizindaba ukuba zilakho ukungena enkingeni nxa zingasebenzisa inkululeko ezilayo ekuqhubeni umsebenzi ngendlela engayisiyo, zisenza ukuganga kwaloluhlobo, ziloba indaba zamanga, ezingelabufakazi.
Wengeza ethi ukwenza kwalezi ntathelizindaba yikwephula umthetho, ziphazamisa umsebenzi wamapholisa wokucubungula loludaba, njengoba bekhona asebabotshwa ngodaba lokusebenzisa itshefu yecyanide, ukubulala indlovu befuna impondo zazo.
Kungakho befuna lezintathelizindaba zeSunday Mail, zibasize ngokubapha amagama abantu ababikwa beyibo ababanika ulwazi olukhomba ukuthi omunye walabo ababalulala indlovu kuyisiphathamandla sesipholiseni.
Kodwa uzulu weHarare, obalisa umnumzana Mandla Dube wase Hatcliff extension utshengise ukukhathazeka phezu kwalesi sehlakalo ethi wethuswa yikubotshwa kwabathathu laba.
Akumelanga zibanjwe ngamandla intathelizindaba ukuba zitsho ukuba ngubani ozinike ulwazi, lapho ziloba izindaba, amapholisa kumele asebenzise indlela zawo ukudingisisa iqiniso, lapho elenkinga ngalokho okulotshwe zintathelizindaba kuveza uDube.
Zikhangelelwe ukumiswa phambi komthethwandaba ngoLwesithathu lezintathelizindaba ezithethwe ngamapholisa ngoMvulo, ngenjongo yokuba zisizane lamapholisa ukuveza isiphathamandla sasesipholiseni, esibikwa saphatheka kusihluku sokubulawa kwendlovu ngokuzithelela itshefu yecyanide lapho ezinatha khona amanzi.
Your browser doesn’t support HTML5
Udaba lokubotshwa kwentathelizindaba ezilobe ngokubulawa kwendlovu eHwange